തിരുവനന്തപുരം: സംസ്ഥാനത്ത് കൊവിഡ് 19 ഭീതി നില നിൽക്കുമ്പോൾ ഗാര്‍ഹിക ഉപഭോക്താക്കള്‍ ഉള്‍പ്പെടെയുള്ളവര്‍ക്ക് വൈദ്യുതി ബിൽ അടയ്ക്കാൻ ഒരു മാസത്തെ സാവകാശം നൽകി സർക്കാർ. മന്ത്രി എംഎം മണി ഫേസ്‌ബുക്ക് പോസ്‌റ്റിലൂടെയാണ് ഇക്കാര്യം വ്യക്തമാക്കിയത്.
മുഖ്യമന്ത്രി പിണറായി വിജയനുമായി മന്ത്രി നടത്തിയ ചർച്ചയ്‌ക്ക് ശേഷമാണ് വൈദ്യുതി ബിൽ അടയക്കാൻ ഒരു മാസത്തെ സാവകാശം നൽകാൻ തീരുമാനമായത്. ഒരു മാസത്തെ സാവകാശമാണ് നൽകുകയെന്നും ഈ കാലയളവിൽ പിഴയടക്കേണ്ടതില്ലെന്നും മന്ത്രി വ്യക്തമാക്കി.
കോവിഡ് 19 വ്യാപനത്തെ തുടർന്ന് സംസ്ഥാനത്താകെ നിരീക്ഷണവും മുൻകരുതലും തുടരുകയാണ്. നിരവധിയാളുകൾ ജോലികളിൽ നിന്ന് വിട്ട് നിൽക്കുകയാണ്. പലയിടത്തും ഓഫീസുകൾ ഉൾപ്പെടെയുള്ള സ്ഥാപനങ്ങൾ അടച്ചു. ഈ സാഹചര്യത്തിലാണ് ജനങ്ങളുടെ ബുദ്ധിമുട്ട് ഒഴിവാക്കാൻ വൈദ്യുതിച്ചാർജുകൾ അടക്കുന്നതിന് എല്ലാവർക്കും ഒരു മാസത്തെ കാലാവധി നൽകാൻ സർക്കാർ തീരുമാനിച്ചത്.
മൂന്നാം ഘട്ട വ്യാപനം തടയുന്നതിന് എല്ലാവരുടെയും പിന്തുണ മുഖ്യമന്ത്രി അഭ്യര്‍ഥിച്ചിരുന്നു. തദ്ദേശ സ്വയംഭരണ സ്ഥാപനങ്ങളുടെയും ജനപ്രതിനിധികളുടെയും ഇടപെടല്‍ ഉണ്ടാകണമെന്ന കർശന നിർദേശമാണ് സർക്കാർ നൽകിയിരിക്കുന്നത്. ലോകത്ത് കൊറോണ വൈറസ് വ്യാപനം ശക്തമാകുകയുമാണ്. ലോകത്ത് 8,000ത്തിലേറെ മരണം റിപ്പോര്‍ട്ട് ചെയ്‍തു കഴിഞ്ഞു. ഇന്ത്യയില്‍ കൊവിഡ് ബാധിതരുടെ എണ്ണം 175 ആയി. കൊവിഡ് 19 ബാധിച്ച് ഇന്ത്യയില്‍ ഇതുവരെ മരിച്ചത് മൂന്ന് പേരാണ്. കേരളത്തില്‍ 27 പേരാണ് ഇതുവരെയുള്ള കണക്കുകള്‍ അനുസരിച്ച് കൊവിഡ് 19 സ്ഥിരീകരിച്ചിട്ടുള്ളത്.
Post Your Comments