ന്യൂഡൽഹി : വടക്കുകിഴക്കന്‍ ഡല്‍ഹിയില്‍ പൗരത്വ ഭേദഗതി നിയമത്തില്‍ പ്രതിഷേധിക്കുന്നവരും അനുകൂലികളും തമ്മിലുണ്ടായ സംഘർഷത്തിനെതിരെ പ്രതികരണവുമായി കോൺഗ്രസ് നേതാവും,വയനാട് എംപിയുമായ രാഹുൽ ഗാന്ധി. ഡല്‍ഹിയില്‍ തുടരുന്ന സംഘര്‍ഷം അസ്വസ്ഥതയുളവാക്കുന്നതാണെന്നു രാഹുൽ ഗാന്ധി ട്വീറ്റ് ചെയ്തു. സമാധാനപരമായ പ്രതിഷേധം ആരോഗ്യകരമായ ജനാധിപത്യത്തിന്റെ അടയാളമാണ്. അക്രമം ഒരിക്കലും ന്യായീകരിക്കാനാകില്ല. ഡല്‍ഹിയിലെ ജനങ്ങള്‍ സംയമനം പാലിക്കണമെന്നും പ്രകോപനങ്ങളില്‍ വീഴരുതെന്നു അഭ്യര്‍ഥിക്കുന്നതായും രാഹുൽ ട്വിറ്ററിൽ കുറിച്ചു.
The violence today in Delhi is disturbing & must be unequivocally condemned. Peaceful protests are a sign of a healthy democracy, but violence can never be justified. I urge the citizens of Delhi to show restraint, compassion & understanding no matter what the provocation.
— Rahul Gandhi (@RahulGandhi) February 24, 2020
അതേസമയം ഡല്‍ഹി സംഘര്‍ഷത്തില്‍ രണ്ടു പേര്‍ കൂടി മരിച്ചതായി റിപ്പോര്‍ട്ട്. പോലീസ് വെടിവയ്പില്‍ തദ്ദേശവാസികളായ രണ്ടുപേര്‍ കൂടി മരിച്ചെന്ന റിപ്പോർട്ടുകളാണ് പുറത്തു വരുന്നത്. നേരത്തേ, കല്ലേറില്‍ പരിക്കേറ്റ പോലീസുകാരന് മരിച്ചിരുന്നു. ഹെഡ്‌ കോണ്‍സ്റ്റബിളായ രത്തന്‍ലാലാണ് മരിച്ചത്. മറ്റൊരു പോലീസുകാരന് പരിക്കേല്‍ക്കുകയും ചെയ്തു. ചാന്ദ്ബാഗ്, ഭജന്‍പുര, മൗജ്പുര്‍, ജാഫറാബാദ് തുടങ്ങിയ ഇടങ്ങളിലാണ് സംഘര്‍ഷം വ്യാപിച്ചത്.
പ്രദേശത്തെ നൂറുകണക്കിന് വീടുകളും കടകളും അക്രമികള്‍ തകര്‍ത്തു. നിരവധി വാഹനങ്ങള്‍ക്ക് തീയിട്ടു. ഡല്‍ഹി ഡെപ്യൂട്ടി പൊലീസ് കമീഷണര്‍ക്ക് കല്ലേറില്‍ പരിക്കേറ്റു. പ്രതിഷേധക്കാര്‍ക്കുനേരെ പൊലീസ് ടിയര്‍ ഗ്യാസ് പ്രയോഗിച്ചു. പൊലീസുകാരന്‍ കൊല്ലപ്പെട്ടതോടെ വടക്കുകിഴക്കന്‍ ഡല്‍ഹിയില്‍ നിരോധനാജ്ഞ പ്രഖ്യാപിച്ചു. കൂടാതെ എട്ട് കമ്ബനി സിആര്‍പിഎഫിനെയും ഒരു കമ്ബനി വനിതാ ദ്രുതകര്‍മ സേനയെയും വടക്കു കിഴക്കൻ ഡൽഹിയിൽ വിന്യസിച്ചിട്ടുണ്ട്.
Post Your Comments