സ്വർണാഭരണങ്ങൾക്ക് ബി.ഐ.എസ് ഹാൾമാർക്കിംഗ് നിർബന്ധമാക്കുന്ന നടപടികൾക്ക് ഇന്ന് തുടക്കമാകും

കൊച്ചി: ഇന്ത്യയിൽ സ്വർണാഭരണങ്ങൾക്ക് ബി.ഐ.എസ് ഹാൾമാർക്കിംഗ് നിർബന്ധമാക്കുന്ന നടപടികൾക്ക് ഇന്ന് തുടക്കമാകും. 14,​ 18,​ 22 കാരറ്ര് സ്വർണാഭരണങ്ങളാണ് വ്യാപാരികൾ ഹാൾമാർക്ക് ചെയ്യേണ്ടത്. ഇതിനായി,​ ഒരുവർഷത്തെ സാവകാശം നൽകും. ചുരുക്കത്തിൽ ,​ 2021 ജനുവരി 15 മുതൽ ഹാൾമാർക്ക് ചെയ്‌ത സ്വർണാഭരണങ്ങൾ മാത്രമേ വിൽക്കാനാകൂ.

മാനദണ്ഡം ലംഘിക്കുന്നവർക്ക് ഒരുലക്ഷം രൂപ മുതൽ സ്വർണാഭരണത്തിന്റെ മൂല്യത്തിന്റെ അ‌ഞ്ചിരട്ടി വരെ പിഴ,​ ഒരുവർഷം ജയിൽ എന്നീ ശിക്ഷകൾ കേന്ദ്രം പാസാക്കിയ ബി.ഐ.എസ് ആക്‌ടിലുണ്ട്. ബി.ഐ.എസ് ഹാൾമാർക്കിംഗിലേക്ക് മാറാനും പഴയ സ്വർണാഭരണങ്ങൾ വിറ്റഴിക്കാനുമാണ് ഒരുവർഷത്തെ സമയം വിതരണക്കാർക്ക് നൽകുന്നത്.

രാജ്യത്ത് 234 ജില്ലകളിലായി 892 ബി.ഐ.എസ് ഹാൾമാർക്കിംഗ് സ്ഥാപനങ്ങളാണുള്ളത്.
28,​849 വ്യാപാരികൾ ബി.ഐ.എസ് രജിസ്‌ട്രേഷൻ നേടിയിട്ടുണ്ട്. അതേസമയം, ഉപഭോക്താക്കളുടെ കൈവശമുള്ള സ്വർണാഭരണങ്ങൾക്ക് പുതിയ നിബന്ധന ബാധകമല്ല.

ALSO READ: സ്വര്‍ണക്കടത്തിന് ഇതുവരെ ആരും പരീക്ഷിയ്ക്കാത്ത മാര്‍ഗം ഉപയോഗിച്ച് തങ്കം കടത്താന്‍ ശ്രമം : പിടികൂടിയത് ലക്ഷങ്ങള്‍ വിലമതിയ്ക്കുന്ന തങ്കം

സ്വർണം ബി.ഐ.എസ് ഹാൾമാർക്ക് ചെയ്‌തതാണോ എന്നറിയാൻ ഉപഭോക്താക്കൾ ആഭരണത്തിൽ നാല് കാര്യങ്ങൾ നോക്കണം: 1. ബി.ഐ.എസ് മാർക്ക്,​ 2. കാരറ്രിൽ സൂചിപ്പിച്ച നിലവാരം,​ 3. ഹാൾമാർക്കിംഗ് സ്ഥാപനത്തിന്റെ പേര്,​ 4. ജുവലറിയുടെ ഐഡന്റിഫിക്കേഷൻ. 2019ന്റെ ആദ്യ ഒമ്പതുമാസത്തിൽ ഇന്ത്യക്കാർ വാങ്ങിയത് 496.11 ടൺ സ്വർണമാണ്.