തിരുവനന്തപുരം: സെക്രട്ടറിയേറ്റിന് മുമ്പിൽ യുഡിഎഫ് ഉപരോധം നടക്കുന്നതിന് പിന്നാലെ യൂണിവേഴ്‌സിറ്റി കോളജിനുമുന്നില്‍ എസ്‌എഫ്‌ഐയുടെ മഹാപ്രതിരോധം നടക്കുകയാണ്.
പൂര്‍വവിദ്യാര്‍ത്ഥികള്‍ ഉള്‍പ്പടെ നൂറ് കണക്കിന് വിദ്യാര്‍ത്ഥികളാണ് സാംസ്‌കാരിക സദസ്സില്‍ പങ്കെടുക്കുന്നത്.
മഹാപ്രതിരോധം എന്ന് പേരിട്ട പരിപാടി പ്രമുഖ സിനിമാപ്രവര്‍ത്തകന്‍ ഷാജി എന്‍ കരുണ്‍ ഉദ്ഘാടനം ചെയ്യും .തെറ്റിനേക്കാള്‍ വലിയ ശരിയാണ് ഞങ്ങള്‍ എന്ന മുദ്രാവാക്യം ഉയര്‍ത്തിയാണ് സംസ്‌കാരിക കൂട്ടായ്മ സംഘടിപ്പിക്കുന്നത്. എസ്എഫ്ഐ തിരുവനന്തപുരം ജില്ലാ കമ്മറ്റിയാണ് സമീപകാല വിവാദങ്ങളുടെ പശ്ചാത്തലത്തില്‍ പരിപാടി സംഘടിപ്പിച്ചിരിക്കുന്നത്.
കോളേജിൽ ഉണ്ടായ സംഘർഷത്തിൽ അഖിലിന് കുത്തേറ്റ സംഭവത്തെ തുടര്‍ന്ന് അപവാദ പ്രചാരണങ്ങള്‍ നടക്കുന്നു എന്ന വാദമുയര്‍ത്തിയാണ് മഹാപ്രതിരോധം എന്ന പേരില്‍ എസ്എഫ്ഐ പ്രതിരോധ സംഗമം നടത്തുന്നത്.യൂണിവേഴ്‌സിറ്റി കോളജുമായി ബന്ധപ്പെട്ട് എസ്‌എഫ്‌ഐക്കെതിരെ ഉയര്‍ന്ന വാര്‍ത്തകളില്‍ ബദല്‍ പ്രചാരണം സംഘടിപ്പിക്കാന്‍ സിപിഎം സംസ്ഥാന നേതൃത്വം നിര്‍ദ്ദേശം നല്‍കിയിരുന്നു. ഇതിന്റെ ആദ്യ ഘട്ടമായാണ് മഹാപ്രതിരോധം സംഘടിപ്പിക്കുന്നത്.
Post Your Comments