ഐലീഗ് മൽസരങ്ങളിലെ മികച്ച ഗോൾകീപ്പർ ഇനി കേരള ബ്ലാസ്റ്റേഴ്സിൽ

കൊച്ചി: ഐലീഗ് മൽസരങ്ങളിലെ മികച്ച ഗോൾകീപ്പർ ബിലാൽ ഹുസൈൻ ഖാൻ ഇനി കേരള ബ്ലാസ്റ്റേഴ്സിൽ. കഴിഞ്ഞ വർഷത്തെ ഐലീഗ് മൽസരങ്ങളിലെ മികച്ച ഗോൾകീപ്പറായി ബിലാലിനെ തെരഞ്ഞെടുത്തുണ്ടായിരുന്നു. ഉത്തർപ്രദേശ് സ്വദേശിയാണ്. ഇരുപത്തിനാലുകാരനായ ബിലാൽ ഇന്ത്യൻ സൂപ്പർ ലീഗിന്റെ 2019-20 സീസണിലേക്കാണ് കേരള ബ്ലാസ്റ്റേഴ്സിനായി കളിക്കുക. 2017-18 ഐലീഗിൽ ബിലാൽ ഖാൻ ഗോകുലം കേരള എഫ്‌സിക്ക് വേണ്ടി കളിച്ചിട്ടുണ്ട്.

ബിലാൽ ഖാൻ മുൻപ് ഐ‌എസ്‌എൽ ടീമായ എഫ്‌സി പുണെ സിറ്റിയുമായി കരാറിലേർപ്പെട്ടിരുന്നു. തുടർന്ന് 2018-19 സീസണിന്റെ തുടക്കത്തിൽ പുതുതായി ആരംഭിച്ച ഐ-ലീഗ് ടീമായ റിയൽ കശ്മീർ എഫ്‌സിക്കുവേണ്ടി കളിച്ചു.

റിയൽ കശ്മീർ എഫ്‌സിയിൽ മികച്ച പ്രകടനമാണു താരം നടത്തിയത്. ടീമിനായി കളിച്ച 19 മത്സരങ്ങളിൽനിന്നു മികച്ച സേവുകൾ നടത്തി ബിലാൽ ശ്രദ്ധ നേടിയിരുന്നു. ചർച്ചിൽ ബ്രദേഴ്‌സ് എഫ്സി, ഹിന്ദുസ്ഥാൻ എഫ്‌സി, മുഹമ്മദൻ എഫ്സി, എഫ്സി ബർദേസ്, സാൽഗോക്കർ എഫ്സി എന്നീ ടീമുകളിലും ബിലാൽ കളിച്ചിട്ടുണ്ട്.