പ്രധാനമന്ത്രി ജന്‍ധന്‍ യോജന അക്കൗണ്ടുകളിലെ നിക്ഷേപത്തിന്റെ ഏറ്റവും പുതിയ കണക്കുകള്‍ പുറത്ത്

ന്യൂഡല്‍ഹി: പ്രധാനമന്ത്രി ജന്‍ധന്‍ യോജന അക്കൗണ്ടിലെ ആകെ നിക്ഷേപം ഒരു ലക്ഷം കോടി കഴിഞ്ഞതായി റിപ്പോര്‍ട്ട്. കേന്ദ്ര ധനകാര്യ മന്ത്രാലയത്തിന്റെ ഏറ്റവും പുതിയ കണക്ക് പ്രകാരം രാജ്യത്തെ 36.06 കോടി പ്രധാനമന്ത്രി ജന്‍ധന്‍ യോജന അക്കൗണ്ടുകളിലായി 1,00,495.94 കോടി രൂപയാണ് ഉള്ളത്. ജൂണ്‍ ആറിന് 99,649.84 കോടി ആയിരുന്നു ആകെ നിക്ഷേപം. ഒരാഴ്ച മുന്‍പിത് 99,232.71 കോടി ആയി മാറി.

ഈ അക്കൗണ്ടുകളിലെ നിക്ഷേപം തുടര്‍ച്ചയായി ഉയരുന്നുവെന്നാണ് കണക്ക്. ജന്‍ധന്‍ അക്കൗണ്ടുകളില്‍ ഒരു രൂപ പോലും നിക്ഷേപം ഇല്ലാത്ത അക്കൗണ്ടുകളുടെ എണ്ണം 5.10 കോടിയില്‍ നിന്ന് 5.07 കോടിയായി കുറഞ്ഞെന്ന് ഈയിടെ ധനകാര്യ മന്ത്രാലയം ലോക്‌സഭയില്‍ വ്യക്തമാക്കിയിരുന്നു. അക്കൗണ്ട് ഉടമകള്‍ക്കുള്ള അപകട ഇന്‍ഷുറന്‍സ് തുക ഒരു ലക്ഷത്തില്‍ നിന്ന് രണ്ട് ലക്ഷമാക്കി ഉയര്‍ത്തിയിരുന്നു. 2018 ആഗസ്റ്റ് 28 ന് ശേഷം അക്കൗണ്ട് തുറന്നവയ്ക്ക് മാത്രമേ ഈ ആനുകൂല്യം ലഭിക്കൂ.