നിയന്ത്രണംവിട്ട കാര്‍ താഴ്ചയിലേക്ക് മറിഞ്ഞ് യുവാവ് മരിച്ചു

കോഴിക്കോട്: അമിതവേഗതയിലെത്തിയ കാര്‍ നിയന്ത്രണം വിട്ട് താഴ്ചയിലേക്ക് മറിഞ്ഞ് യുവാവിനു ദാരുണാന്ത്യം. കോഴിക്കോട് പൂവാറംതോട് കല്ലംപുല്ലിൽ തിരുവമ്പാടി കയത്തിങ്കൽ സിജിബാബു(42) ആണ് മരിച്ചത്. ശനിയാഴ്ച രാത്രിയായിരുന്നു അപകടമുണ്ടായത്. കല്ലംപുല്ലിൽ വളവിൽ വെച്ച് കാർ നിയന്ത്രണം വിടുകയും 70 അടിയോളം താഴ്ചയിലുള്ള പുഴയോരത്തേക്ക് മറിയുകയുമായിരുന്നു. സിജിയുടെ ദേഹത്ത് പതിച്ച നിലയിലായിരുന്നു കാർ. ഏറെ നേരത്തെ ശ്രമത്തിനൊടുവിലാണ് കാറിനടിയിൽ നിന്നും
സിജിയെ പുറത്തെടുത്തത്. ഉടൻ തന്നെ  കോഴിക്കോട് മെഡിക്കൽ കോളേജ് ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു. പോസ്റ്റ്മോർട്ടത്തിന് ശേഷം മൃതദേഹം സംസ്കരിച്ചു.