നിങ്ങൾ നൻമയുള്ള മനുഷ്യനാണ്; കുമ്മനത്തോട് സൂസെപാക്യം

തിരുവനന്തപുരം: ലോക്സഭാ തെരഞ്ഞെടുപ്പിൽ തിരുവനന്തപുരത്ത് സ്ഥാനാർത്ഥിയാകുന്ന കുമ്മനം രാജശേഖരനോട് നിങ്ങൾ നൻമയുള്ള മനുഷ്യനാണെന്ന് ആര്‍ച്ച് ബിഷപ്പ് സൂസെപാക്യം പറഞ്ഞു. നിങ്ങളിലെ ആ നൻമ നിലനിര്‍ത്താൻ എന്നും കഴിയട്ടെ , വിശ്വസിക്കുന്ന ആശയങ്ങളിൽ എന്നും ഉറച്ച് നിൽക്കുന്ന ആളാണ് കുമ്മനം. പരസ്പര ബഹുമാനം നിലനിര്‍ത്താൻ എന്നും കഴിയട്ടെ എന്നും സൂസെപാക്യം
ആശംസിച്ചു.

തിരുവനന്തപുരത്ത് വെള്ളയമ്പലത്തെ ബിഷപ്പ് ഹൗസിലെത്തിയാണ് കുമ്മനം ആര്‍ച്ച് ബിഷപ്പ് സൂസെപാക്യവുമായി കൂടിക്കാഴ്ച നടത്തിയത്. കുമ്മനം മുമ്പ് ഗവർണറായി ഇരുന്ന മിസോറാമിലെ വിശേഷങ്ങളും ഫാദർ ചോദിച്ചറിഞ്ഞു. ഞങ്ങൾ രാഷ്ട്രീയം പറയാറില്ലെന്ന് സുസെപാക്യം പറഞ്ഞപ്പോൾ അനുഗ്രഹം മതിയെന്നും കുമ്മനം മറുപടി പറഞ്ഞു. മാധ്യമങ്ങളെ ഒഴിവാക്കി പതിനഞ്ച് മിനിറ്റോളം ഇരുവരും കൂടിക്കാഴ്ച നടത്തി.