രഞ്ജി ട്രോഫി സെമിയില്‍ കേരളത്തിന് ഇന്നിംഗ്‌സ് തോല്‍വി

കൃഷ്ണഗിരി: വിദര്‍ഭയ്‌ക്കെതിരായ രഞ്ജി ട്രോഫി ക്രിക്കറ്റ് സെമിയില്‍ കേരളത്തിന് തോല്‍വി. ഒരു ഇന്നിംഗ്‌സിനും 11 റണ്‍സിനുമായിരുന്നു വിദര്‍ഭ കേരളത്തെ തകര്‍ത്തത്. മേഷ് യാദവിന്റെ 5 വിക്കറ്റ് പ്രകടനമാണ് വിദര്‍ഭയുടെ ജയം അനായാസമാക്കിയത്. രണ്ട് ഇന്നിംഗ്‌സുകളില്‍ നിന്ന് 12 വിക്കറ്റാണ് ഉമേഷ് യാദവ് സ്വന്തമാക്കിയത്.

ഒന്നിന് 59 എന്ന മികച്ച സ്‌കോറില്‍ നിന്ന് 7 റണ്‍സ് എടുക്കുന്നതിനെതിരെ 6 വിക്കറ്റുകള്‍ നഷ്ടപ്പെട്ടതാണ് കേരളത്തിന് വിനയായത്. അരുണ്‍ കാര്‍ത്തിക് (36), ജലജ് സക്സേന (7), വിഷ്ണു വിനോദ് (15), സച്ചിന്‍ ബേബി (0), മുഹമ്മദ് അസറുദ്ദീന്‍ (1), വിനൂപ് (5), പി. രാഹുല്‍ (1), സിജോമോന്‍ ജോസഫ് (17), ബേസില്‍ തമ്പി (2), നിതീഷ് (3) എന്നിങ്ങനെയാണ് കേരള താരങ്ങളുടെ സ്‌കോറുകള്‍. സന്ദീപ് വാര്യര്‍ (4) പുറത്താവാതെ നിന്നു.

ആദ്യ ഇന്നിംഗ്‌സില്‍ കേരളം വിദര്‍ഭയെ 208 റണ്‍സില്‍ ഒതുക്കി. 102 റണ്‍സ് ലീഡായിരുന്നു ഒന്നാം ഇന്നിംഗ്‌സില്‍ വിദര്‍ഭ നേടിയത്. ഒരു ഘട്ടത്തില്‍ 170ന് രണ്ട് എന്ന നിലയിലായിരുന്നു വിദര്‍ഭ. എന്നാല്‍ രണ്ട് റണ്‍ കൂട്ടിച്ചേര്‍ക്കുന്നതിനിടെ അഞ്ച് വിക്കറ്റുകള്‍ അവര്‍ക്ക് നഷ്ടമായി. ഇതോടെ 172ന് ഏഴ് എന്ന നിലയായി. വൈകാതെ 183ന് എട്ടിലേക്കും 194ന് ഒമ്പതിലേക്കും സന്ദര്‍ശകര്‍ വീണു. വാലറ്റത്ത് ഉമേഷ് യാദവ് (പുറത്താവാതെ എട്ട് പന്തില്‍ 17) നടത്തിയ പ്രകടനമാണ് ലീഡ് 100 കടത്തിയത്.