ഓയില്‍മില്ലിന് തീപിടിച്ചു : ലക്ഷങ്ങളുടെ നഷ്ടം

കണ്ണൂര്‍ : ആഞ്ചരക്കണ്ടി ചാമ്പാട് ഓയില്‍മില്ലിന് തീപിടിച്ചു. ശനിയാഴ്ച്ച രാത്രി 9 മണിയോടെയായിരുന്നു സംഭവം. ചാമ്പാടുള്ള എന്‍.രഘുനാഥിന്റെ ഉടമസ്ഥതയിലുള്ള രാസണ്‍സ് ഓയില്‍ മില്ലിനാണ് തീപിടിച്ചത്.

കൊപ്ര മില്ലിനോട് ചേര്‍ന്നുള്ള കൊപ്ര ഡ്രയര്‍ യൂണിറ്റില്‍ നിന്നാണ് തീ പടര്‍ന്നത്. പരിസരത്തുള്ളവരാണ് തീ ആദ്യം കണ്ടത്. ഉടന്‍ തന്നെ അഗ്നിരക്ഷാസേനയുടെ മൂന്ന് യൂണിറ്റുകള്‍ സ്ഥലത്തെത്തി തീ അണച്ചു. തീപിടുത്തത്തിന്റെ കാരണം വ്യക്തമായിട്ടില്ല.

ഡ്രയര്‍ യൂണിറ്റില്‍ ഉണക്കാന്‍ വെച്ച കൊപ്രയും സംഭരണ യൂണിറ്റില്‍ സൂക്ഷിച്ചിരുന്ന കൊപ്രകളും കത്തിനശിച്ചിട്ടുണ്ട്. 30 ലക്ഷം രൂപയുടെ നഷ്ടം പ്രാഥമികമായി കണക്കാക്കുന്നുണ്ട്. രാത്രി 11 മണിയോടെ തീ നിയന്ത്രണ വിധേയമാക്കി.