കൊച്ചി: മകനെ രാഷ്ട്രീയത്തില്‍ ഇറക്കിയ കോണ്‍ഗ്രസ് നേതാവ് എ.കെ ആന്റണിയെ പരിഹസിച്ച് രാഷ്ട്രീയ നിരീക്ഷകനായ അഡ്വ എ. ജയശങ്കര്‍. എ.കെ.ആന്റണിയുടെ മകന് അനില്‍ ആന്റണിയെ കഴിഞ്ഞ ദിവസം കെ.പി.സി.സി ഡിജിറ്റല്‍ മീഡിയ സെല്ലിന്റെ സംസ്ഥാന കണ്‍വീനറായി നിയമിച്ചതിനു പിന്നലെയാണ് ജയശങ്കറിന്റെ പ്രതികരണം. ഫേസ്ബുക്ക് പോസ്റ്റിലൂടെയാണ് ജയശങ്കര്‍ ആന്റണിയെ പരിഹസിച്ചത്. നേരത്തേ മക്കള്‍ രാഷ്ട്രീയത്തില്‍ വലിയ എതിര്‍ത്ത ആന്റണി ഇപ്പോള്‍ മകനെ രാഷ്ട്രീയത്തില്‍ ഇറക്കുന്നതിനെതിരെയാണ് ജയശങ്കറിന്റെ പോസ്റ്റ്.
അടിയന്തരാവസ്ഥക്കാലത്ത് ഗുവാഹത്തിയില്‍ ചെന്ന് ഇന്ദിരാഗാന്ധിയുടെ മക്കള്‍ രാഷ്ട്രീയത്തെ എതിര്‍ത്ത വില്ലാളിവീരന്‍ ആന്റണിപില്‍ക്കാലത്ത് ഗാന്ധി കുടുംബ വാഴ്ച അംഗീകരിക്കുകയും, കെ.കരുണാകരന്റെ മകന് തിരഞ്ഞെടുപ്പില്‍ സീറ്റ് വാങ്ങി നല്‍കുകയും ചെയ്തു. ഇപ്പോള്‍ സ്വന്തം മകനെ ഡിജിറ്റല്‍ മീഡിയ സെല്‍ വഴി കേരള രാഷ്ട്രീയത്തില്‍ കെട്ടിയിറക്കാനാണ് ആന്റണി ശ്രമിക്കുന്നതെന്നാണ് ജയശങ്കര്‍ പറഞ്ഞത്.
അങ്കുശമില്ലാത്ത കാപട്യമേ, മണ്ണില്‍ ആന്റണിയെന്നു വിളിക്കട്ടെ നിന്നെ ഞാന്‍!
ഫേസ്ബുക്ക് പോസ്റ്റിന്റെ പൂര്‍ണരൂപം
ഒരിടത്തൊരിടത്ത് ഒരു ആന്റപ്പനുണ്ടായിരുന്നു. ആദര്‍ശ ധീരന്‍. അടിയന്തരാവസ്ഥ കാലത്ത് ഗുവാഹത്തിയില്‍ ചെന്ന് ഇന്ദിരാഗാന്ധിയുടെ മക്കള്‍ രാഷ്ട്രീയത്തെ എതിര്‍ത്ത വില്ലാളിവീരന്‍. സഞ്ജയ് ഗാന്ധിയെ കേരളത്തില്‍ കാലെടുത്തു കുത്താന്‍ അനുവദിക്കാതിരുന്ന ധര്‍മ്മപുത്രന്‍.
കാലം മാറി, കഥ മാറി. ആന്റപ്പന്‍ പില്‍ക്കാലത്ത് അല്പം വിട്ടുവീഴ്ച ചെയ്തു. ഗാന്ധി കുടുംബ വാഴ്ച അംഗീകരിച്ചു; കരുണാകരന്‍ മൂത്രമൊഴിക്കാന്‍ പോയപ്പോള്‍ മകന് കിങ്ങിണിക്കുട്ടനു സീറ്റ് വാങ്ങിക്കൊടുത്തു. അപ്പോഴും അവനവന്റെ കാര്യത്തില്‍ ആദര്‍ശവാനായി തുടര്‍ന്നു.
കാലം പിന്നെയും മാറി. ഇപ്പോള്‍ മകന് അമ്മിണിക്കുട്ടനെ കേരള രാഷ്ട്രീയത്തില്‍ കെട്ടിയിറക്കുന്നു.
കിങ്ങിണിക്കുട്ടന്‍ സേവാദള്‍ വഴിയാണ് വന്നതെങ്കില്‍, ഡിജിറ്റല്‍ മീഡിയ സെല്‍ വഴിക്കാണ് അമ്മിണിക്കുട്ടന്റെ രംഗപ്രവേശം.
അങ്കുശമില്ലാത്ത കാപട്യമേ, മണ്ണില്‍
ആന്റണിയെന്നു വിളിക്കട്ടെ നിന്നെ ഞാന്‍!
Post Your Comments