മുഖ്യമന്ത്രിയുടെ ദുരിതാശ്വാസ നിധിയിലേക്ക് ഈ സംസ്ഥാനത്തു നിന്ന് വീണ്ടും സഹായം

തിരുവനന്തപുരം : മുഖ്യമന്ത്രിയുടെ ദുരിതാശ്വാസ നിധിയിലേക്ക് ആന്ധ്രാപ്രദേശിൽ നിന്ന് വീണ്ടും സഹായം. 1.34 കോടി രൂപയുടെ സഹായമാണ് ഇത്തവണ ലഭിച്ചത്. പ്രളയ ദുരന്തത്തെ തുടർന്ന് ആന്ധ്രപ്രദേശ് സർക്കാർ കേരളത്തിന് നേരത്തെയും സഹായം ലഭ്യമാക്കിയിരുന്നു. ഇതുവരെ 56 കോടി രൂപയുടെ സഹായമാണ് ആന്ധ്രയിൽ നിന്ന് കേരളത്തിന് ലഭിച്ചത്. ആന്ധ്രപ്രദേശ് മുഖ്യമന്ത്രിയുടെ ഓഫീസിലെ റിയൽടൈം ഗവേണൻസിന്റെ ചീഫ് എക്‌സിക്യൂട്ടീവ് ഓഫീസർ ബാബു അഹമ്മദ് തുക മുഖ്യമന്ത്രിയുടെ പ്രൈവറ്റ് സെക്രട്ടറി എം.വി. ജയരാജന് കൈമാറി.

ആന്ധ്ര പവർ യുട്ടിലിറ്റീസിലെ ജീവനക്കാരുടേതുൾപ്പെടെ ആന്ധ്രപ്രദേശ് ട്രാൻസ്മിഷൻ കോർപറേഷൻ ഒരു കോടി രൂപയാണ് ഇത്തവണ നൽകിയത്. വിസാഗിലെ കെട്ടിട നിർമാതാക്കളുടെ സംഘടന, ഇൻഡസ്ട്രിയൽ എസ്‌റ്റേറ്റ് മാനുഫാക്ചറേഴ്‌സ് അസോസിയേഷൻ, ഇ സേവാ വിഭാഗം ഡയറക്ടറും ജീവനക്കാരും തുക നൽകിയിട്ടുണ്ട്. വ്യക്തികളുടെ സംഭാവനകളും ഉൾപ്പെടുന്നു.