മാല മോഷ്ടിച്ചു കടന്ന കള്ളനെ പുലര്‍ച്ചെ സ്‌കൂട്ടറില്‍ പിന്തുടര്‍ന്ന് തൊഴിച്ച് താഴെയിട്ട് വീട്ടമ്മ

റാന്നി: വീടിനുള്ളില്‍ കടന്ന് മാല മോഷ്ടിച്ച് കടന്നു കളഞ്ഞ മോഷ്ടാവിനെ വീട്ടമ്മ സ്‌കൂട്ടറില്‍ പിന്തുടര്‍ന്ന് പിടികൂടി.  വടശേരിക്കര ബംഗ്ലാംകടവിനു സമീപം മുള്ളന്‍പാറ തടത്തില്‍ മാത്യു ജോസഫിന്റെ (ഷിബു) ഭാര്യ ഷോജിയാണ് കള്ളനെ സ്്കൂട്ടറില്‍ പിന്തുടര്‍ന്ന് തൊഴിച്ചു താഴെയിട്ടത്. പുലര്‍ച്ചെ മൂന്നിനാണു സംഭവം. ജനല്‍കമ്പി വളച്ച് വീടിനകത്തു കടന്ന കള്ളന്‍ മാല മോഷ്ടിച്ച് സ്‌കൂട്ടറില്‍ കടന്നു കളയുകയായിരുന്നു. ഇതറിഞ്ഞ വീട്ടമ്മ സ്‌കൂട്ടറില്‍ പിന്തുടര്‍ന്നു തൊഴിച്ചു താഴെയിട്ടു. മല്‍പിടിത്തത്തിനിടെ കടന്നുകളഞ്ഞ കള്ളന്‍ പിന്നീടു നാട്ടുകാരുടെ പിടിയിലായി.

അടിച്ചിപ്പുഴ കച്ചേരിത്തടം കൊല്ലംപറമ്പില്‍ ബാലേഷാണു (35) പിടിയിലായത്. നാലര പവന്റെ മാലയാണ് ഇയാള്‍ കട്ടെടുത്ത്. ഇതിനിടെ ഉണര്‍ന്ന ഷോജി പുറത്ത് ആളു നില്‍ക്കുന്നതു കണ്ടു നോക്കിയപ്പോള്‍ മാല നഷ്ടപ്പെട്ടെന്നു മനസ്സിലായി. എന്നാല്‍ കള്ളന്‍ അപ്പോഴേക്കും ഓടി സ്‌കൂട്ടറില്‍ കയറിയ കള്ളന്‍ വേഗത്തില്‍ ബൈക്കോടിച്ച് രക്ഷപ്പെടുകയായിരുന്നു. ഇതോടെ കള്ളനെ പിന്തുടരാന്‍ ഷോജി തീരുമാനിക്കുകയായിരുന്നു. ഭര്‍ത്താവിനോട് പറഞ്ഞ ശേഷമാണ് ഷോബി തന്റെ സ്‌കൂട്ടറെടുത്ത് കള്ളനു പിന്നാലെ പാഞ്ഞത്. തുടര്‍ന്ന് നാലു കിലോമീറ്ററോളം പിന്തുടര്‍ന്ന് മാടമണ്‍ വള്ളക്കടവിനു സമീപത്തെ കട്ടിങ്ങിലെത്തിയപ്പോള്‍ മോഷ്ടാവിന്റെ ബൈക്ക് സ്‌കൂട്ടര്‍ കൊണ്ട് ഇടിച്ചിട്ടു. ഇതോടെ കള്ളനായ ബാലേഷ് താഴെ വീഴുകയായിരുന്നു.

സ്‌കൂട്ടര്‍ നിര്‍ത്തി ചാടിയിറങ്ങിയ ഷോജിയും ബാലേഷുമായി മല്‍പിടുത്തമുണ്ടായി. രക്ഷിക്കണേ എന്നു പറഞ്ഞാണ് ഷോജി ഇയാളുമായി മല്‍പ്പിടുത്തത്തില്‍ ഏര്‍പ്പെട്ടത്. എന്നാല്‍ കള്ളന്‍ രക്ഷപ്പെടാനായി ഷോജിയുടെ ചുരിദാര്‍ വലിച്ചുകീറുകയും മുടി  വലിച്ചുപറിക്കുകയുമൊക്കെ ചെയ്തിരുന്നു.  ഇത് മുതലാക്കിയ കള്ളന്‍ സ്‌കൂട്ടറുമെടുത്തു കടന്നു കളഞ്ഞു. എന്നാല്‍ ഇതിനിടെ കള്ളന്റെ മൊബൈല്‍ ഫോണ്‍ ഷോജി കൈക്കലാക്കിയിരുന്നു. മൊബൈല്‍ നഷ്ടപ്പെട്ട കള്ളന്‍ അതന്വേഷിച്ച് സംഭവ സ്ഥലത്ത് തിരിച്ചെത്തുമെന്ന് ഷോബി കരുതിയിരുന്നു. ഇതിനാല്‍ നാട്ടുകാരെ ഈ വിവരം അറിയിച്ച്
ഭര്‍ത്താവിനെ വിളിച്ചുവരുത്തി ഷോജി മടങ്ങി.

അഞ്ചു മണിയോടെ ഈ ഫോണില്‍ മോഷ്ടാവ് വിളിച്ചെങ്കിലും ഇവര്‍ എടുത്തില്ല. തുടര്‍ന്ന് ഫോണ്‍ റോഡില്‍ നഷ്ടപ്പെട്ടതാവാമെന്ന് കരുതി ഇയാള്‍ തിരഞ്ഞെത്തി. അതേസമയം നടക്കാനിറങ്ങിയ ചൂരക്കുഴി സ്വദേശി അജി പണിക്കരാണു സംഭവം നടന്ന ഭാഗത്തു സംശയ സാഹചര്യത്തില്‍ ബാലേഷിനെ കണ്ടത്. തുടര്‍ന്നു സമീപവാസികളെ വരുത്തി തടഞ്ഞുവച്ചു. ഷോജി ആളെ തിരിച്ചറിഞ്ഞതോടെ പ്രതിയെ പോലീസിനെ വിളിച്ച് കൈമാറി. ഇയാളുടെ സ്‌കൂട്ടറിനുള്ളില്‍ നിന്നും മാല പോലീസ് കണ്ടെടുത്തിട്ടുണ്ട്.

ഇതിനു മുമ്പും ഷോജി മറ്റൊരു കള്ളനെ പിടികൂടിയിട്ടുണ്ട്. രാവിലെ 6 മണിയോടെ മൊബൈല്‍ ഫോണ്‍ തട്ടിയെടുത്ത ബംഗാളിയെ 3 കിലോമീറ്റര്‍ യാത്ര ചെയ്താണ് അന്ന് പിടികൂടിയത്. വെച്ചൂച്ചിറ കുംഭിത്തോട് തൈക്കൂട്ടത്തില്‍ കുടുംബാംഗമാണ് ഷോജി. വടശേരിക്കരയില്‍ ചിക്കന്‍ സെന്റര്‍ നടത്തുകയാണു ഷിബു. ഷാനയും കൃപയുമാണു മക്കള്‍.