അനന്തപുരി ഒളിച്ചോടുന്ന കുട്ടികളുടെ എണ്ണത്തിന്റെ കാര്യത്തിലും ഒന്നാമന്‍

തിരുവനന്തപുരം: സ്വന്തം വീടുകളില്‍ നിന്നും പല കാരണങ്ങളാല്‍ ഒളിച്ചോടുന്ന കുട്ടികളുടെ എണ്ണം ഏറ്റവും കൂടുതല്‍ തിരുവനന്തപുരത്ത്. റെയില്‍വേ ചൈല്‍ഡ് ലൈനിന്റേതാണ് ഈ കണക്കുകള്‍. നാട് വിട്ട് ഒളിച്ചോടുന്നതിനായി കുട്ടികള്‍ കൂടുതലും ട്രെയിന്‍ ആണ് തിരഞ്ഞെടുക്കുന്നത്. അതുകൊണ്ട് തന്നെ ഇങ്ങനെ ഒളിച്ചോടുന്ന ഭൂരിഭാഗം കുട്ടികളെയും റെയില്‍വേ സ്റ്റേഷനില്‍ നിന്നുതന്നെയാണ് കണ്ടെത്തുന്നത്.

തിരുവനന്തപുരം, എറണാകുളം, തൃശൂര്‍, കോഴിക്കോട് എന്നിവിടങ്ങളിലാണ് കേരളത്തില്‍ റെയില്‍വേ ചൈല്‍ഡ് ലൈന്‍ പ്രവര്‍ത്തിക്കുന്നത്. കഴിഞ്ഞ ഏപ്രില്‍ മുതല്‍ നവംബര്‍ വരെ ഒളിച്ചോടിയ ആകെ 372 കുട്ടികളെയാണ് ഇവര്‍ മാത്രമായി കണ്ടെത്തിയത്. ഇതില്‍ തിരുവനന്തപുരത്ത് നിന്നും 185 കുട്ടികളാണ് ഒളിച്ചോടിയത്. കൂടാതെ കോഴിക്കോട് നിന്നും 111, എറണാകുളത്ത് നിന്നും 66, തൃശൂരില്‍ നിന്നും 10 കുട്ടികളെ കാണാതാവുകയും വിവിധ റെയില്‍വേ സ്റ്റേഷനുകളില്‍ നിന്നും കണ്ടെത്തുകയും ചെ യ്തു. മാത്രമല്ല കഴിഞ്ഞ എട്ടുമാസത്തിനുള്ളില്‍ കാണാതായതായി കേസ് രജിസ്റ്റര്‍ ചെയ്ത 33 കുട്ടികളേയും വിവിധ റെയില്‍വേ സ്റ്റേഷനുകളില്‍ നിന്ന് റെയില്‍വേ ചൈല്‍ഡ് ലൈന്‍ പ്രവര്‍ത്തകര്‍ കണ്ടെത്തിയിട്ടുണ്ട്.