പത്തനംതിട്ട: ശബരിമല സുരക്ഷയെ സംബന്ധിച്ച് പ്രതികരണവുമായി എസ്പി യതീഷ് ചന്ദ്ര. ശബരിമലയില്‍ തീര്‍ത്ഥാടകരുടെ തിരക്ക് വര്‍ധിച്ചു വരികയാണ്. എന്നാല്‍ ഒന്നടങ്കം പൊലീസിന്റെ നിയന്ത്രണത്തിലാണെന്നും ഒരു പ്രതിഷേധങ്ങള്‍ക്കും സാധ്യതയില്ലെന്നും അദ്ദേഹം പറഞ്ഞു. അതേസമയം കേന്ദ്രമന്ത്രി പൊന്‍ രാധാകൃഷ്ണനോട് അപമര്യാദയായി പെരുമാറി എന്ന ആരോപണത്തില്‍ പ്രതികരിക്കാനില്ലെന്നും എല്ലാം വരുമ്പോള്‍ നോക്കാമെന്നും അദ്ദേഹം പറഞ്ഞു.
നിലയ്ക്കലും പമ്പയും സന്നിധാനവും പൊലീസിന്റെ പൂര്‍ണനിയന്ത്രണത്തിലാണ്. ഒരു ക്രമസമാധാന പ്രശ്നവുമില്ല. പൊലീസിന്റെ ഉദ്ദേശം തീര്‍ത്ഥാടകര്‍ വരിക എന്നതാണ്.ബസുകള്‍ നിറഞ്ഞ് തീര്‍ത്ഥാടകര്‍ പോയി കൊണ്ടിരിക്കുകയാണ്. സേവനമനോഭാവത്തോടെയാണ് പൊലീസ് നിലക്കൊളളുന്നത്. ഇതര സംസ്ഥാനങ്ങളില്‍ നിന്നും ഭക്തന്മാര്‍ വരുന്നുണ്ട്.രാവിലെ 11 മണിയായപ്പോഴേക്കും 20000 തീര്‍ത്ഥാടകര്‍ പോയിക്കഴിഞ്ഞതായും യതീഷ് ചന്ദ്ര പറഞ്ഞു.
നിരോധനാജ്ഞ പിന്‍വലിക്കുന്നത് ഉള്‍പ്പെടെയുളള വിഷയങ്ങളില്‍ തീരുമാനം എടുക്കേണ്ടത് ജില്ലാ ഭരണകൂടമാണാണെന്നും, തങ്ങള്‍ 15 ദിവസത്തേ സ്പെഷ്യല്‍ ഡ്യൂട്ടിക്ക് വന്നതാണെന്നും അദ്ദേഹം പറഞ്ഞു. പത്തംനംതിട്ടയില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം.
നിലയ്ക്കലിലെ സുരക്ഷാ ചുമതലയില്‍ നിന്ന് മാറ്റി എന്ന വ്യാജപ്രചാരണങ്ങളുമായി ബന്ധപ്പെട്ട ചോദ്യത്തിന് താന്‍ ഇവിടെ നില്‍ക്കുകയല്ലേ, നിങ്ങള്‍ തന്നെ പറഞ്ഞാല്‍ മതിയെന്നും യതീഷ് ചന്ദ്ര പറഞ്ഞു.
Post Your Comments