ആഭാസസമരത്തിന് പിന്തുണയുമായി കേന്ദ്രമന്ത്രിമാരെത്തുന്നത് പ്രതിഷേധാർഹം: ശബരിമല പ്രതിഷേധക്കാരെ തെറിജപക്കാരെന്ന് വിളിച്ചും മന്ത്രി തോമസ്‌ ഐസക്

തിരുവനന്തപുരം•സുപ്രിംകോടതിയ്ക്കും ഭരണഘടനയ്ക്കുമെതിരെ ശബരിമല കേന്ദ്രീകരിച്ചു നടക്കുന്ന ആഭാസസമരത്തിന് പിന്തുണയുമായി കേന്ദ്രമന്ത്രിമാരെത്തുന്നത് പ്രതിഷേധാർഹമാണെന്ന് ധനമന്ത്രി ഡോ. തോമസ്‌ ഐസക്. സുപ്രിംകോടതി വിധി നടപ്പാക്കരുത് എന്ന നിലപാടുണ്ടെങ്കിൽ കേന്ദ്രസർക്കാരിൽ സമ്മർദ്ദം ചെലുത്തി പ്രശ്നപരിഹാരത്തിനു ശ്രമിക്കുകയാണ് കേന്ദ്രമന്ത്രിമാർ ചെയ്യേണ്ടത്. അതിനു പകരം കേരളത്തിൽ ക്രമസമാധാനലംഘനത്തിന് ഔദ്യോഗിക പദവി ദുരുപയോഗപ്പെടുത്തുന്നത് ദൂരവ്യാപകമായ പ്രത്യാഘാതങ്ങളുണ്ടാക്കുമെന്നും അദ്ദേഹം ഫേസ്ബുക്ക് പോസ്റ്റില്‍ പറഞ്ഞു.

നിയമവാഴ്ച ഉറപ്പുവരുത്തേണ്ട ഉദ്യോഗസ്ഥരെ ഭീഷണിപ്പെടുത്തി വരുതിയ്ക്കു നിർത്താൻ ശ്രമിക്കുക, അവരെ ജാതിയും മതവും പറഞ്ഞ് പരസ്യമായി അധിക്ഷേപിക്കുക തുടങ്ങി കേരളത്തിലെ ബിജെപി നേതാക്കൾ നടത്തുന്ന തരംതാണ ഭീഷണിയ്ക്ക് കൂട്ടുനിൽക്കേണ്ടവരല്ല കേന്ദ്രമന്ത്രിമാർ. കുറച്ചുകൂടി ചുമതലാബോധവും ഉത്തരവാദിത്തവും അവരിൽ നിന്ന് പ്രതീക്ഷിക്കുന്നുണ്ട്.

കഴിഞ്ഞ ദിവസം സന്നിധാനത്ത് നാമജപസമരത്തിന് കേന്ദ്രമന്ത്രി പൊൻരാധാകൃഷ്ണനാണ് നേതൃത്വം നൽകിയത്. ഇത് ആപൽക്കരമായ സന്ദേശമാണ് നൽകുന്നത്. ക്രമസമാധാനം ലംഘിക്കാൻ കേന്ദ്രമന്ത്രി നേതൃത്വം നൽകിയത് കേട്ടുകേൾവിയില്ലാത്ത സംഭവമാണ്. ഇതുപോലെ ഇനിയും കേന്ദ്രമന്ത്രിമാർ വരുമെന്നാണ് കേൾക്കുന്നത്. സുപ്രിംകോടതിവിധി നടപ്പാക്കാൻ അനുവദിക്കില്ലെന്നാവശ്യപ്പെട്ടാണ് സമരം എന്ന കാര്യം കേന്ദ്രമന്ത്രിമാർ ഓർക്കണം. സാഹചര്യത്തിന്റെ ഗൌരവം കണക്കിലെടുത്ത് മന്ത്രിമാരെ നിരുത്സാഹപ്പെടുത്താൻ പ്രധാനമന്ത്രി തയ്യാറാകണം.

കൃത്യനിർവഹണച്ചുമതലയുള്ള പോലീസുദ്യോഗസ്ഥരുടെ മനോവീര്യം തകർക്കാനും തങ്ങളുടെ വരുതിയ്ക്കു നിർത്താനും തരംതാണ പ്രവൃത്തികളാണ് ബിജെപി നേതാക്കളുടെ ഭാഗത്തു നിന്നുണ്ടാകുന്നത്. ഈ സമ്മർദ്ദത്തിനു കീഴ്പ്പെടാതെ സത്യസന്ധമായി ചുമതല നിർവഹിക്കുന്നതിന് പൊതുസമൂഹത്തിൻ്റെ പിന്തുണ ഉദ്യോഗസ്ഥർക്കുണ്ട്. ഇന്ത്യയിൽ മറ്റേതു സംസ്ഥാനത്തുള്ളതിനേക്കാൾ സത്യസന്ധമായും പക്ഷപാതരഹിതമായും പ്രവർത്തിക്കുന്ന ഉദ്യോഗസ്ഥ സംവിധാനമാണ് കേരളത്തിലേത്. അതിൻ്റെ മനോവീര്യം തകർക്കാൻ തെറിജപക്കാരെ അനുവദിക്കാനാവില്ലെന്നും തോമസ്‌ ഐസക് കൂട്ടിച്ചേര്‍ത്തു.