പരിയാരം: വിവാഹവാഗ്ദാനം നല്‍കി യുവതിയെ വര്‍ഷങ്ങളോളം പീഡനത്തിനിരയാക്കിയ ദന്ത ഡോക്ടര്‍ അറസ്റ്റില്‍. ചെറുപുഴയിലെ നിത്യചൈതന്യ ദന്തല്‍ ക്ലിനിക്ക് ഉടമ കോഴിക്കോട് സ്വദേശി ശ്യാംകുമാര്‍ എന്ന ഡോ. ഷാ മേനോന്‍ (48) ആണ് പിടിയിലായത്. പിലാത്തറ സ്വദേശിനിയായ യുവതിയെ വിവാഹവാഗ്ദാനം നല്‍കി പതിനഞ്ച് വര്‍ഷത്തോളം പീഡിപ്പിക്കുകയും സ്വത്ത് തട്ടിയെടുക്കുകയും ചെയ്തുവെന്ന പരാതിയിലാണ് അറസ്റ്റ്.
അതേസമയം ശ്യാം കുമാറുമായുള്ള ബന്ധത്തില്‍ പരാതികാരിയായ യുവതിക്ക് ഒരു കുട്ടിയുമുണ്ട്. വിവാഹം കഴിക്കാമെന്ന് മോഹിപ്പിച്ച് ഇത്രയും വര്‍ഷം പീഡിപ്പിച്ചുവെന്നും ഇപ്പോഴാണ് ഡോക്ടര്‍ക്ക് മറ്റൊരു ഭാര്യയും കുട്ടികളുമുണ്ടെന്ന് അറിയാനിടയായതെന്നും പരാതിയില്‍ പറയുന്നു. ഇതിനിടെ ഡോക്ടര്‍ക്ക് കാഞ്ഞങ്ങാട്ടെ ഒരു യുവതിയുമായും ബന്ധമുണ്ടെന്ന വിവരവും പോലീസിന് ലഭിച്ചു.
ഡിവൈ.എസ്.പി. കെ.വി.വേണുഗോപാലിന്റെ നിര്‍ദേശപ്രകാരം പരിയാരം പോലീസും സ്‌പെഷ്യല്‍ സ്‌ക്വാഡും ചേര്‍ന്ന് കാഞ്ഞങ്ങാട്ട് വ്യാഴാഴ്ച രാത്രിയാണ് ഇയാളെ പിടികൂടി പരിയാരം പോലീസ് സ്റ്റേഷനിലെത്തിച്ചത്. ജാമ്യമില്ലാത്ത വകുപ്പുകളാണ് ഇയാള്‍ക്കെതിരെ ചുമത്തിയിരിക്കുന്നത്.
പ്രതിയെ പയ്യന്നൂര്‍ കോടതി റിമാന്‍ഡ് ചെയ്തു.
Post Your Comments