ജീപ്പും കാറും കൂട്ടിയിടിച്ച് നിരവധിപേർക്ക് പരിക്ക്

കുമളി: ജീപ്പും കാറും കൂട്ടിയിടിച്ച് നിരവധിപേർക്ക് പരിക്ക്. അണക്കരയ്ക്കു സമീപം കടശ്ശിക്കടവിൽ ജീപ്പും കാറും കൂട്ടിയിടിച്ചാണ് ആറുപേർക്കു പരിക്കേറ്റത്.

കടശിക്കടവിനുസമീപം കൊടുംവളവിലായിരുന്നു അപകടം. കുമളിയിൽനിന്ന്‌ വരികയായിരുന്ന ജീപ്പ് നിയന്ത്രണം നഷ്ടപ്പെട്ട് എതിരേ വന്ന കാറിൽ ഇടിക്കുകയും ഇടിയുടെ ആഘാതത്തിൽ ജീപ്പ് മറിയുകയായിരുന്നു.

അപകടത്തിൽ കാറിന്റെ മുൻഭാഗം പൂർണമായി തകർന്നു. കാറിലുണ്ടായിരുന്ന പാമ്പനാർ സ്വദേശികളായ മൂന്നുപേർക്കും പുളിയൻമല സ്വദേശികളായ മൂന്നു ജീപ്പ് യാത്രക്കാർക്കുമാണ് പരിക്കേറ്റത്. ഇവരെ നാട്ടുകാർചേർന്ന് കട്ടപ്പനയിലെ സ്വകാര്യ ആശുപത്രിയിൽ പ്രവേശിപ്പിച്ചു. അപകടത്തെ തുടർന്ന് വാഹനങ്ങളിലെ ഓയിലും ഡീസലും റോഡിൽ പടർന്നു. കട്ടപ്പനയിൽനിന്ന്‌ അഗ്നിരക്ഷാസേനയെത്തി വേണ്ട നടപടികൾ സ്വീകരിച്ചു.