എെപിഎച്ച് മുൻ എഡിറ്റർ പി.ടി. അബ്ദുറഹ്​മാൻ അന്തരിച്ചു

കോഴിക്കോട്​: എഴുത്തുകാരനും ബഹുഭാഷാ പണ്ഡിതനും ഇസ്​ലാമിക്​ പബ്ലിഷിങ്​ ഹൗസ്മുൻ എഡിറ്ററുമായിരുന്ന റഹ്​മാൻ മുന്നൂർ എന്ന പി.ടി. അബദുറഹ്​മാൻ (61) അന്തരിച്ചു.

ഒരേസമയം അറബി, ഇംഗ്ലീഷ്, ഉർദു ഭാഷകളിൽനിന്ന് മലയാളത്തിലേക്ക് വിവർത്തനം ചെയ്യാൻ കഴിയുന്ന മലയാളത്തിലെ എണ്ണം പറഞ്ഞ വിവർത്തകരിൽ ഒരാളായിരുന്നു. കോഴിക്കോട്​ ചാത്തമംഗലം മുന്നൂരിൽ തെക്കേക്കാരൻ മുഹമ്മദി​​​ന്റെയും ആമിനയുടെയും മകനായി 1956 ഡിസംബർ 22ന്​ ജനിച്ചു.

ഇസ്​ലാമിയ കോളെജിൽനിന്ന്​ ബിരുദവും കാലിക്കറ്റ്​ സർവകലാശാലയിൽനിന്ന്​ അറബി സാഹിത്യത്തിൽ എം.എയും കരസ്​ഥമാക്കി. മലയാളത്തിലെ പ്രമുഖ പുസ്​തക പ്രസാധകരായ എെ.പി.എച്ച്​ എഡിറ്ററായി 2017ൽ വിരമിച്ച അദ്ദേഹം ഇസ്​ലാമിക വിജ്​ഞാന കോശം അസോ. എഡിറ്റർ, ആരാമം ചീഫ്​ എഡിറ്റർ, പ്രബോധനം വാരിക സബ്​​ എഡിറ്റർ, ബോധനം ത്രൈമാസിക എഡിറ്റർ എന്നീ സ്​ഥാനങ്ങൾ വഹിച്ചു. ഇടക്കാലത്ത് സൗത്ത് വിഷൻ, ധർമധാര തുടങ്ങിയ ദൃശ്യ മാധ്യമങ്ങളുടെ ചുമതലയും അദ്ദേഹം വഹിക്കുകയുണ്ടായി. നിരവധി ഒാഡിയോ കാസറ്റുകൾക്ക്​ ഗാനരചന നടത്തുകയും ടെലിവിഷൻ പരിപാടികൾക്ക്​ തിരക്കഥ എഴുതുകയും ചെയ്​തിട്ടുണ്ട്​.