ശാസ്താംകോട്ട: ഭാര്യയെ കഴുത്തറുത്ത് കൊലപ്പെടുത്താന്‍ ശ്രമിച്ചയാള്‍ പിടിയില്‍. മദ്യലഹരിയില്‍ ഭാര്യയെ കൊലപ്പെടുത്താന്‍ ശ്രമിച്ച കരിന്തോട്ടുവ പുഷ്പസദനത്തില്‍ പുഷ്പാംഗദനാണ് (55) പൊലീസ് പിടിയിലായത്. ഭാര്യ ചന്ദ്രമതിയെ മര്‍ദിച്ചശേഷം കത്തികൊണ്ട് കഴുത്തറുക്കാന്‍ ശ്രമിക്കുകയായിരുന്നു ഇയാള്‍. കഴുത്തിനും ശ്വാസനാളത്തിനും ഗുരുതര പരുക്കേറ്റ ചന്ദ്രമതി ആലപ്പുഴ വണ്ടാനം മെഡിക്കല്‍ കോളജില്‍ ചികിത്സയിലാണ്.
കഴിഞ്ഞ ദിവസം ഉച്ചയ്ക്കു രണ്ടിനാണു സംഭവം. മദ്യപിച്ചെത്തുന്ന പുഷ്പാംഗദന്‍ നിരന്തരം ഭാര്യയെ ഉപദ്രവിക്കുമായിരുന്നു. സംഭവദിവസവും ഭാര്യയെ മര്‍ദിച്ച് അവശയാക്കി ചവിട്ടി വീഴ്ത്തിയ ശേഷം കത്തി കൊണ്ടു കഴുത്തറുക്കാന്‍ ശ്രമിച്ചു. സംഭവസമയത്തു മരുമകളും ബന്ധുവായ മറ്റൊരു പെണ്‍കുട്ടിയും വീട്ടിലുണ്ടായിരുന്നു. നിലവിളി കേട്ട് അയല്‍വാസികള്‍ എത്തിയപ്പോഴേക്കും ഇയാള്‍ ഓടിമറഞ്ഞു. മൊബൈല്‍ ഫോണ്‍ വിറ്റ ശേഷം കണ്ണൂരിലേക്കു രക്ഷപ്പെടുന്നതിനായി പ്രതി തയാറെടുത്തിരുന്നു. നാടുവിടുന്നതിനായി വീട്ടില്‍ വന്നു വസ്ത്രം മാറുമെന്ന പ്രതീക്ഷയില്‍ പൊലീസ് കാത്തിരുന്നു. രാവിലെ 5നു വീടിനു സമീപത്തു നിന്ന് പൊലീസ് പിടികൂടുകയായിരുന്നു.
Post Your Comments