മണിക്കൂറുകള്‍ നീണ്ട കാത്തിരിപ്പിനൊടുവില്‍ ഫാൻ ഫൈറ്റുകൾക്കിടയിൽ പ്രേക്ഷകരുടെ ഇഷ്ട മത്സരാർത്ഥി സാബു മോൻ അബ്ദുസമദ് വിന്നറായ സന്തോഷത്തിലാണ് ആരാധകർ. നൂറ് ദിനമെന്ന ലക്ഷ്യവുമായി പ്രേക്ഷകര്‍ക്ക് മുന്നിലെത്തിയ ബിഗ് ബോസ് മലയാളം ഗ്രാന്റ് ഫിനാലെ അവസാനിച്ചപ്പോൾ പ്രതീക്ഷിച്ചത് പോലെ സാബു തന്നെയായിരുന്നു വിന്നർ. ടാസ്‌ക്കുകളിലെ പ്രകടനം മാത്രമല്ല പ്രേക്ഷകരുടെ വോട്ടിങ്ങും ഏറെ നിര്‍ണ്ണായകമായിരുന്നു. പ്രിയപ്പെട്ട മത്സരാര്‍ത്ഥികളെ ജയിപ്പിക്കാനുള്ള നെട്ടോട്ടത്തിലായിരുന്നു ഫാന്‍സ് ഗ്രൂപ്പുകള്‍. സാബു, സുരേഷ്, ശ്രിനിഷ്, ഷിയാസ്, പേളി മാണി എന്നിവരായിരുന്നു ഫിനാലെയിലേക്കെത്തിയതെങ്കിലും അവസാന നിമിഷത്തെ ട്വിസ്റ്റിലൂടെ സുരേഷും ശ്രീനിയും പുറത്തേക്ക് പോവുകയായിരുന്നു. സാബുവും ഷിയാസും പേളിയുമായിരുന്നു മത്സരത്തില്‍ അവശേഷിച്ചിരുന്നത്.മൂന്ന് പേരുടെയും ബിഗ് ബോസ് യാത്രയെക്കുറിച്ചുള്ള വീഡിയോ ക്ലിപ്പിങ്ങുകളും ബിഗ് ബോസ് കാണിച്ചിരുന്നു. 
മൂന്ന് പേരില്‍ നിന്നും ആദ്യം പുറത്തേക്കെത്തിയത് ഷിയാസായിരുന്നു. ടാസ്‌ക്ക് പെര്‍ഫോം ചെയ്യുന്ന സഥലത്ത് നിന്നും മോഹന്‍ലാല്‍ അദ്ദേഹത്തെ വേദിയിലേക്ക് വിളിക്കുകയായിരുന്നു. മത്സരത്തില്‍ ഇപ്പോഴുള്ളവരെല്ലാം തന്നെക്കാളും കഴിവുള്ളവരാണെന്നായിരുന്നു ഷിയാസ് പറഞ്ഞത്. സാബുവിനെ മുതിര്‍ന്ന ചേട്ടനായും പേളിയെ ചേച്ചിയായും അനിയത്തിയായുമൊക്കെയാണ് കാണുന്നതെന്നാണ് താരം പറഞ്ഞത്. നാളുകള്‍ക്ക് ശേഷം എല്ലാവരെയും കണ്ടപ്പോള്‍ വിറയ്ക്കുകയാണെന്നും താരം പറഞ്ഞിരുന്നു. ജയിക്കണമെന്നാഗ്രഹിച്ച്‌ മത്സരത്തില്‍ തുടര്‍ന്നയാളായിരുന്നു താരം. അദ്ദേഹം കൂടി പുറത്തെത്തിയതോടെയാണ് കാഴ്ചക്കാരുടെ ആകാംക്ഷ വര്‍ധിച്ചത്.
ഷിയാസ് തനിക്കൊപ്പമുണ്ടെന്നും സുരക്ഷിതനായി ഇവിടയെത്തിയിട്ടുണ്ടെന്നും മോഹന്‍ലാല്‍ പറഞ്ഞിരുന്നു. പേളി മാണിയും സാബുവുമായിരുന്നു ബിഗ് ഹൗസില്‍ അവശേഷിച്ചിരുന്നത്. ബിഗ് ബോസ് മലയാള പതിപ്പിലെ ശക്തരായ രണ്ട് മത്സരാര്‍ത്ഥികള്‍, ഇവരിലാരായിരിക്കും വിജയിക്കുന്നതെന്ന ആകാംക്ഷയോടെയാണ് മത്സരാര്‍ത്ഥികളും സദസ്സും പരിപാടി വീക്ഷിച്ചത്. മികച്ച സ്വീകാര്യതയും പ്രേക്ഷക പിന്തുണയുമാണ് ഇരുവര്‍ക്കും ലഭിക്കുന്നത്. സാബുവായിരിക്കും വിജയിക്കുന്നതെന്ന തരത്തിലുള്ള പ്രവചനങ്ങള്‍ നേരത്തെ തന്നെ നടന്നിരുന്നു. പ്രേക്ഷകരുടെ പ്രതീക്ഷ തെറ്റിയില്ല ഗൂഗിള്‍ സാബു തന്നെയാണ് വിജയിയായത്.നടിയും അവതാരകയുമായ പേളി മാണിയാണ് ഫസ്റ്റ് റണ്ണര്‍ അപ്. നന്നായിക്കൂടെ സാബു എന്ന ഒരു ചോദ്യമാണ് തന്നെ മാറ്റി മറിച്ചതെന്നും, എങ്കിൽ നന്നാകാൻ ശ്രമിക്കാം എന്ന് താൻ തീരുമാനിക്കുകയായിരുന്നു എന്നുമാണ് തന്റെ വിജയ രഹസ്യമായി സാബു പറയുന്നത്.
കോണ്‍ഫിഡന്റ് ഗ്രൂപ്പ് നല്‍കുന്ന ഒരു കോടിയുടെ ഫ്‌ലാറ്റാണ് സാബുവിന് സമ്മാനം. വിജയ് ബാബു ലിജോ ജോസ് പെല്ലിശ്ശേരി കൂട്ടുകെട്ടിലെ സിനിമയിലേക്ക് സാബുവിന് ക്ഷണവും തേടിയെത്തിയിട്ടുണ്ട്.അവസാന നിമിഷം വരെ പേളിയും സാബുവും തമ്മില്‍ കടുത്ത മത്സരമായിരുന്നു. ഫൈനലിസ്റ്റുകളായി അവശേഷിച്ച 5 പേരില്‍ സുരേഷ് ആദ്യം പുറത്ത് പോയി, പിന്നെ ശ്രീനിഷ്, ഷിയാസ്… ഒടുവില്‍ അവശേഷിച്ച രണ്ടുപേര്‍ സാബുവും പേളിയും. 
ഒട്ടേറെ നാടകീയ മുഹൂര്‍ത്തങ്ങള്‍ക്ക് സാക്ഷ്യം വഹിച്ച വേദിയായിരുന്നു ബിഗ് ബോസ്. പുറം ലോകവുമായി യാതൊരു വിധ സമ്പര്‍ക്കങ്ങളും ഇല്ലാതെ നൂറ് ദിനങ്ങള്‍ ഒരു വീട്ടില്‍ പല സ്വഭാവമുള്ള വ്യക്തികളുമൊത്ത് ഒരുമിച്ചു കഴിയുക എന്നത് പതിനാറ് പേരെ സംബന്ധിച്ചും കടുത്ത വെല്ലുവിളി തന്നെയായിരുന്നു.ഡച്ച്‌ ടിവി സീരിസ് ആയ ബിഗ് ബ്രദറില്‍ നിന്നും പ്രചോദനമുള്‍ക്കൊണ്ടാണ് ബിഗ് ബോസ് ഇന്ത്യന്‍ പ്രേക്ഷകരിലേക്കും എത്തിത്തുടങ്ങിയത്. പരിപാടിയുടെ ഹിന്ദി പതിപ്പാണ് ആദ്യം ആരംഭിച്ചത്. സല്‍മാന്‍ ഖാന്‍ ആണ് ഹിന്ദി പതിപ്പിന്റെ അവതാരകനായി എത്തുന്നത്. ബോളിവുഡിലെ പല താരങ്ങളുടെയും തുടക്കം ബിഗ് ബോസിലൂടെയാണ്. സണ്ണി ലിയോണ്‍ ബോളിവുഡില്‍ എത്തിയത് ബിഗ് ബോസിലൂടെയായിരുന്നു.
Post Your Comments