വീട്ടിനുള്ളിൽ യുവാവ് കൊല്ലപ്പെട്ട നിലയില്‍ കണ്ടെത്തിയ സംഭവം; അയല്‍വാസി അറസ്റ്റിൽ

പത്തനംതിട്ട: വീട്ടിനുള്ളിൽ യുവാവ് കൊല്ലപ്പെട്ട നിലയില്‍ കണ്ടെത്തിയ സംഭവത്തിൽ അയൽവാസി പിടിയിൽ. ഇലന്തുർ കൊല്ലംപാറ പ്രസാദ് ഭവനിൽ പ്രസാദിനെയാണ് കൊല്ലപ്പെട്ടത്. കൊല്ലൻ പറ ലക്ഷം വീട് കോളനിയിലെ വീട്ടിൽ ഒറ്റക്ക് താമസിച്ചിരുന്ന പ്രസാദിനെ രാവിലെയാണ് മരിച്ച നിലയിൽ കണ്ടത്. കഴുത്തിലേറ്റ മുറിവിൽ നിന്ന് രക്തം വാർന്ന നിലയിലായിരുന്നു മൃതദേഹം. സംഭവവുമായി ബന്ധപ്പെട്ട് അയൽവാസിയെ പോലീസ് കസ്റ്റഡിയിലെടുത്തു. കഴിഞ്ഞ ദിവസം രാത്രി കോളനിയിലെ താമസക്കാരായ രണ്ട് പേർ പ്രസാദുമായി വാക്കേറ്റമുണ്ടായതായും ഇവർ പ്രസാദിനെ മർദിക്കുകയും ചെയ്തിരുന്നതായി സമീപവാസികൾ പറഞ്ഞു.

ഡോഗ് സ്ക്വാഡിന്റെ നടത്തിയ പരിശോധനയിൽ സമീപത്തെ വീട്ടിൽ നിന്നും രക്തം പുരണ്ട വസ്ത്രങ്ങൾ കണ്ടെടുത്തിട്ടുണ്ട്. പ്രസാദുമായി സംഘർഷത്തിലേർപ്പെട്ട ആളുടെ വീട്ടിൽ നിന്നുമാണ് രക്തം പുരണ്ട വസ്ത്രം കണ്ടെടുത്തത്. കൊലപാതകവുമായി ബന്ധപ്പെട്ട് സമീപവാസിയായ സബിത്ത് എന്നയാളെയാണ് പോലീസ് അറസ്റ്റ് ചെയ്തത്. ഇയാൾ നിരവധി ക്രിമിനൽ കേസുകളിൽ ഉൾപ്പെട്ടിട്ടുള്ള ആളാണെന്നാണ് വിവരം. ആറൻമുള പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.