ശബരിമല വിഷയത്തിൽ ഹർത്താൽ: ബലമായി കടകളടപ്പിച്ച അഞ്ചു സി പി ഐ പ്രവർത്തകർ അറസ്റ്റിൽ

പാലക്കാട്: ശബരിമല ഹർത്താൽ അനുകൂലികളെന്നവകാശപ്പെട്ടു ബലമായി കടകളടപ്പിക്കുകയും ബസ് തടയാൻ ശ്രമിക്കുകയും ചെയ്ത അഞ്ചു സി പി ഐ പ്രവർത്തകർ അറസ്റ്റിൽ. സി ഐ ഐ ജില്ലാക്കമ്മറ്റിയെപോലും ഞെട്ടിച്ചായിരുന്നു ഏതാനും പ്രവർത്തകരുടെ അക്രമം. കുന്നങ്കാട് സി പി ഐ ബ്രാഞ്ച് സെക്രട്ടറി സിനോജ്, എ ഐ വൈ എഫ് മരുതറോഡ് പഞ്ചായത്ത് സെക്രട്ടറി കൃഷ്ണദാസ്, സി പി ഐ പ്രവർത്തകരായ സുധീഷ് , രതീഷ്, രമേശ് എന്നിവരാണ് അറസ്റ്റിലായവർ.

ഇന്നലെ രാവിലെ എട്ടുമണിക്ക് പാലക്കാട് കൊട്ടേക്കാട് റൂട്ടിലെ ബസുകളാണ്‌ ഇവരടങ്ങുന്ന ഒരു സംഘം തടഞ്ഞത്. ഒന്നരമണിക്കൂർ ഗതാഗതം ഇതുമൂലം തടസ്സപ്പെട്ടു. കൂടാതെ കടകൾ അടപ്പിക്കാനും ശ്രമം നടന്നു. പോലീസ് എത്തിയപ്പോഴേക്കും പലരും രക്ഷപെട്ടു. പോലീസ് പിന്തുടർന്ന് പിടികൂടിയവരാണ് ഈ സി പി ഐ പ്രവർത്തകർ.

ചില സംഘടനകൾ പ്രഖ്യാപിച്ച ഹർത്താൽ സംഘപരിവാർ അനുകൂല സംഘടനകൾ ഉൾപ്പെടെ മിക്ക ഹൈന്ദവ സംഘടനകളും തള്ളിക്കളഞ്ഞിരുന്നു. അതെ സമയം സംഭവത്തിൽ പാർട്ടിക്ക് പങ്കില്ലെന്നും അക്രമം നടത്തിയവക്കെതിരെ നടപടിയെടുക്കണമെന്നും സിപിഐ മലമ്പുഴ മണ്ഡലം സെക്രട്ടറി എസ് എസ് രാമചന്ദ്രൻ അറിയിച്ചു.