തീപ്പാറുന്ന പോരാട്ടത്തിനൊടുവിൽ സമീര്‍ വര്‍മ്മ രണ്ടാം റൗണ്ടിൽ

ജക്കാർത്ത: ബ്ലിബ്ലി ഇന്തോനേഷ്യ ഓപ്പണില്‍ ഡെന്മാർക്കിന്റെ റാസ്‍മസ് ഗെംകേയെ 21-9, 12-21, 22-20 എന്ന സ്കോറിനു പരാജയപ്പെടുത്തി സമീര്‍ വര്‍മ്മ രണ്ടാം റൗണ്ടില്‍ കടന്നു. കാണികളെ മുൾമുനയിൽ നിർത്തിയ പോരാട്ടത്തിലായിരുന്നു ഇന്ത്യന്‍ താരത്തിന്റെ ജയം.

Read also:അത്‌ലറ്റിക്കോ മാഡ്രിഡ് സൂപ്പർ താരം ഇനി ഖത്തർ ക്ലബ്ബിൽ

ആദ്യ ഗെയിം 21-9 എന്ന സ്കോറിന് നിഷ്പ്രയാസം ജയിച്ച സമീർ രണ്ടാം ഗെയിമിൽ ഗെംകേയ്ക്ക് മുന്നിൽ സ്കോർ കണ്ടെത്താൻ വിയർക്കുന്നതാണ് കണ്ടത്. 12-21 എന്ന നിലയിൽ സമീർ രണ്ടാം ഗെയിമിൽ ഗെംകേയോട് അടിയറവ് പറഞ്ഞെങ്കിലും മൂന്നാം ഗെയിമില്‍ അവസാന നിമിഷം വരെ ഇരു താരങ്ങളും തമ്മിലുള്ള വാശിയേറിയ പോരാട്ടത്തിനാണ് കാണികൾ സാക്ഷിയായത്. ഇഞ്ചോടിഞ്ച് പോരാട്ടത്തിനൊടുവിൽ 22-20 എന്ന സ്കോറിന് മൂന്നാം ഗെയിമും സ്വന്തമാക്കി സമീര്‍ വര്‍മ്മ ഡെന്മാര്‍ക്ക് താരത്തെ പിന്തള്ളുകയായിരുന്നു.