മുതിര്‍ന്ന കോണ്‍ഗ്രസ് നേതാവ് പി ചിദംബരത്തിന്റെ ബന്ധുവിനെ കൊല്ലപ്പെട്ട നിലയില്‍ കണ്ടെത്തി. മൂന്നംഗ സംഘം തട്ടിക്കൊണ്ട് പോയി കൊലപ്പെടുത്തുകയായിരുന്നു. ചിദംബരത്തിന്റെ ബന്ധു സി ശിവമൂര്‍ത്തി(47) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് മൂന്ന് പ്രതികളെയും പോലീസ് അറസ്റ്റ് ചെയ്തു.
വസ്ത്രകയറ്റുമതിക്കാരനായ ശിവമൂര്‍ത്തിയെ തിങ്കളാഴ്ച മുതല്‍ കോയമ്പത്തൂരില്‍ നിന്നും കാണാനില്ലായിരുന്നു. തുടര്‍ന്ന് ബന്ധുക്കള്‍ പോലീസില്‍ പരാതി നല്‍കി. കഴിഞ്ഞ ദിവസം ജിപിആര്‍എസ് സംവിധാനത്തിന്റെ സഹായത്തോടെ ശിവമൂര്‍ത്തിയുടെ കാര്‍ വെല്ലൂരില്‍ നിന്നും പോലീസ് കണ്ടെത്തിയിരുന്നു. തുടര്‍ന്ന് പോലീസ് നടത്തിയ പെട്രോളിംഗില്‍ മൂന്ന് പേര്‍ പിടിയിലായി. ഇവരെ ചോദ്യം ചെയ്തതോടെ കൊലപാതക രഹസ്യം വെളിയിലായി.
തിരുപ്പൂരില്‍ നിന്നും ശിവമൂര്‍ത്തിയെ തട്ടിക്കൊണ്ട് പോയെന്നും തിങ്കളാഴ്ച മേട്ടുപ്പാളയത്ത് എത്തിച്ച് കൊലപ്പെടുത്തിയെന്നും സംഘം പോലീസിനോട് കുറ്റ സമ്മതം നടത്തി. പിന്നീട് മൃതദേഹം കര്‍ണാടക-തമിഴ്‌നാട് അതിര്‍ത്തി ഹൊസൂരില്‍ ഉപേക്ഷിച്ചുവെന്നും വെളിപ്പെടുത്തി. കൊലപാതക കാരണം വ്യക്തമായിട്ടില്ല.
Post Your Comments