കോതമംഗലം: വീടിന് തീയിട്ടു ഭാര്യയെ കൊല്ലാൻ ശ്രമിച്ച ഭര്‍ത്താവ് പിടിയിൽ. സംഭവത്തില്‍ കുട്ടമ്പുഴ പിണവൂര്‍കുടി പ്ലാക്കൂട്ടത്തില്‍ ഷാജി(42)യെയാണ് കുട്ടമ്പുഴ പോലീസ് അറസ്റ്റ് ചെയ്തത്. ഭാര്യ സന്ധ്യയുടെ മൊഴിയെ തുടർന്നാണ് ഇയാളെ പോലീസ് കസ്റ്റഡിയില്‍ എടുത്തത്.
വർഷങ്ങളായി ഇരുവരും വേർപിരിഞ്ഞു കഴിയുകയാണ്. ഷാജി മറ്റൊരു സ്ത്രീക്കൊപ്പമായിരുന്നു താമസം. എന്നാൽ കഴിഞ്ഞ ദിവസം രാത്രി മദ്യലഹരിയില്‍ വീട്ടിലെത്തിയ ഷാജി തന്നെ ആക്രമിച്ചെന്നും തുടര്‍ന്ന് അവശനിലയില്‍ താന്‍ അകത്ത് കിടക്കുമ്പോൾ ഇയാൾ വീടിന് തീയിടുകയായിരുന്നെന്നുമാണ് സന്ധ്യ പൊലീസില്‍ മൊഴി നല്‍കിയത്. തീപടരുന്നത് കണ്ടപ്പോൾ സന്ധ്യ പുറത്തേക്ക് ഓടി രക്ഷപ്പെടുകയായിരുന്നു. വീടുനിള്ളിൽ സൂക്ഷിച്ച പതിനായിരം രൂപയും വീട്ടുപകരണങ്ങളും പൂർണമായും കത്തി നശിച്ചു.
നാട്ടുകാര്‍ വിവരമറിയിച്ചതിനെ തുടര്‍ന്ന് സ്ഥലത്തെത്തിയ കുട്ടമ്പുഴ പോലീസ് നാട്ടുകാരുടെ സഹകരണത്തോടെ തീയണച്ചു. വീട്ടില്‍ അതിക്രമിച്ച്‌ കയറി മര്‍ദ്ദിച്ചതിനും വീടിന് തീയിട്ട് നാശ നഷ്ടം വരുത്തിയതിനും ജാമ്യമില്ലാ വകുപ്പുകള്‍ ഉള്‍പ്പെടുത്തി ഷാജിക്കെതിരെ പോലീസ് കേസെടുത്തു.
Post Your Comments