കണ്ണൂർ: മാഹിയിൽ ബിജെപി പ്രവർത്തകൻ ഷമേജിനെ വധിച്ച മൂന്നു സിപിഎം പ്രവർത്തകർ കൂടി അറസ്റ്റിലായി. ന്യൂ മാഹി സ്വദേശികളായ മുഹമ്മദ് ഫൈസൽ, പി സജീഷ്, ആർ റഹീം എന്നിവർ ആണ് അറസ്റ്റിലായത്.കൊല നടത്തിയ മൂന്നുപേര്‍ നേരത്തെ അറസ്റ്റിലായിരുന്നു. കൊലയുമായി ബന്ധപ്പെട്ട് ഇന്നലെ മാഹി റെയില്‍വേ സ്റ്റേഷന്‍ പരിസരത്ത് പിടിയിലായ ചെറുകല്ലായിലെ ഷാജി (46) ഷമേജിന്റെ ബന്ധുവാണ്. അറസ്റ്റിലായ ന്യൂമാഹിയിലെ ബൈത്തുല്‍ ഫയീം വീട്ടില്‍ മുഹമ്മദ് ഫൈസല്‍ ഷമേജിന്റെ അടുത്ത സുഹൃത്തും.
നേരത്തെ എം.എം ഷാദി, ഷബിന്‍ രവീന്ദ്രന്‍, ലിജിന്‍ എന്നീ മൂന്നുപേരെ അന്വേഷണസംഘം അറസ്റ്റുചെയ്തിരുന്നു. പള്ളൂരില്‍ സി.പി.എം പ്രാദേശിക നേതാവ് ബാബു കൊല്ലപ്പെട്ട് മണിക്കൂറുകള്‍ക്കകമാണ് ഷമേജ് കൊല്ലപ്പെട്ടത്. ജോലി കഴിഞ്ഞ് വീട്ടിലേക്ക് മടങ്ങുമ്പോള്‍ സുഹൃത്ത് ഫൈസല്‍ വിളിച്ചതുകൊണ്ട് മാത്രമാണ് ഷമേജ് ഓട്ടോ നിര്‍ത്തിയതെന്നാണ് പൊലീസ് അന്വേഷണത്തില്‍ വ്യക്തമായത്. അപ്പോഴേക്കും ഷാജിയും രവീന്ദ്രനും ഷബിനും ഷമേജിനെ വെട്ടിയിരുന്നു.
ഇന്നലെ അറസ്റ്റിലായിരുന്നവര്‍ക്ക് മനസലിവുണ്ടായിരുന്നുവെങ്കില്‍ ഒരുപക്ഷെ ഷമേജ് കൊല്ലപ്പെടില്ലായിരുന്നുവെന്നാണ് പൊലീസ് പറയുന്നത്. ഷമേജ് വധക്കേസില്‍ ഇതോടെ ആറ് പേര്‍ അറസ്റ്റിലായി. ഇനി രണ്ട് പേര്‍കൂടി അറസ്റ്റിലാകാനുണ്ട്. ഇവര്‍ അന്വേഷണ സംഘത്തിന്റെ വലയിലായിട്ടുണ്ടെന്നാണ് അറിയുന്നത്. ഇന്നലെ അറസ്റ്റിലായവരെ ഇന്ന് കോടതിയില്‍ ഹാജരാക്കും.
Post Your Comments