കര്‍ണാടക : ഉപതിരഞ്ഞെടുപ്പ് നടക്കാനിരിക്കുന്ന മണ്ഡലങ്ങളില്‍ പടയൊരുക്കം തുടങ്ങി. ജയനഗറിലും രാജരാജേശ്വരി നഗറിലും പ്രചരണം ശക്തമാക്കാന്‍ ബിജെപി തീരുമാനം.കേന്ദ്ര മന്ത്രി സദാനന്ദഗൗഡ രാജരാജേശ്വരി നഗറിലെയും കേന്ദ്ര മന്ത്രി എച്ച്‌.എന്‍ അനന്ത് കുമാര്‍ ജയനഗറിലെയും പചാരണങ്ങള്‍ ഏകോപിപ്പിക്കും. രണ്ടു സീറ്റിലും ധാരണയുണ്ടാക്കി അനായാസ ജയം ഉറപ്പിക്കാനുള്ള ഒരുക്കത്തിലാണ് കോണ്‍ഗ്രസും ജെഡിഎസും. നിലവിലുള്ള സാഹചര്യത്തില്‍ ഈ രണ്ടു സീറ്റുകളും ബിജെപിയ്ക്ക് നിര്‍ണായകമാണ്.
ബിജെപി സ്ഥാനാര്‍ത്ഥിയും സിറ്റിങ് എംഎല്‍എയുമായിരുന്ന ബി.എന്‍. വിജയകുമാറിന്റെ നിര്യാണത്തെത്തുടര്‍ന്ന് മാറ്റിവെച്ച ജയനഗര്‍ മണ്ഡലത്തില്‍ ജൂണ്‍ 11നാണ് തിരഞ്ഞെടുപ്പ്. ഈ മണ്ഡലം പത്ത് വര്‍ഷമായി ബിജെപിയെയാണ് പിന്തുണച്ചിരുന്നത്. വിജയകുമാറിന്റെ ഇളയസഹോദരന്‍ പ്രഹ്ലാദ് ബാബു ഇവിടെ ബിജെപി സ്ഥാനാര്‍ത്ഥിയായേക്കും. മുന്‍മന്ത്രി രാമലിംഗ റെഡ്ഡിയുടെ മകള്‍ സൗമ്യ റെഡ്ഡിയാണ് കോണ്‍ഗ്രസിനായി ഇവിടെ ജനവിധി തേടുന്നത്. പതിനായിരത്തോളം തിരച്ചറിയല്‍ കാര്‍ഡ് പിടിച്ചെടുത്ത സംഭവത്തെ തുടര്‍ന്നാണ് രാജരാജേശ്വരി നഗറില്‍ തിരഞ്ഞെടുപ്പ് നീട്ടി വച്ചത്. മെയ് 28 ആണ് പുതിയ തീയതി.
ഇവിടെ കോണ്‍ഗ്രസിനുവേണ്ടി സിറ്റിങ് എം.എല്‍.എ മുനിരത്ന മത്സരിക്കും. ബി.ജെ.പിക്ക് പി.എം. മുനിരാജു ഗൗഡയും ജെ.ഡി.എസിലെ ജി.എച്ച്‌. രാമചന്ദ്രയും മല്‍സരിക്കുന്നു. എന്നാല്‍ ഈ രണ്ട് മണ്ഡലങ്ങളിലും ജെഡിഎസും കോണ്‍ഗ്രസും ധാരണയുണ്ടാക്കിയുട്ടുണ്ടെന്നാണ് വിവരം. ഈ രണ്ട് മണ്ഡലങ്ങളില്‍ മാത്രമല്ല തെരഞ്ഞെടുപ്പ് നടക്കുന്നത്. ചന്നപട്ടണയിലും രാമനഗരയിലും വിജയിച്ച എച്ച്‌.ഡി. കുമാരസ്വാമി ഒന്ന് രാജിവെക്കുമ്പോള്‍ വീണ്ടും തെരഞ്ഞെടുപ്പ് നടത്തേണ്ടിവരും.
Post Your Comments