ന്യൂഡല്‍ഹി: കത്വയില്‍ എട്ടുവയസുകാരി ബലാത്സംഗത്തിനിരയായി കൊല്ലപ്പെട്ട സംഭവത്തില്‍ പൊലീസ് അന്വേഷണത്തില്‍ പിഴവുണ്ടായിട്ടില്ലെന്നും സി ബി ഐ അന്വേഷണം ആവശ്യമില്ലെന്നും ജമ്മു കശ്മീര്‍ ഡി ജി പി എസ്.പി വായിദ്. ഹിന്ദുക്കളായോ മുസ്ലിംകളായോ അല്ല കേസില്‍ അന്വേഷണം നടത്തിയത്. ശരിയായ രീതിയിലുള്ള അന്വേഷണമാണ് ഇപ്പോള്‍ മുന്നോട്ട് പോവുന്നതെന്നും അദ്ദേഹം വ്യക്തമാക്കി.
നേരത്തെ കത്വ ബലാത്സംഗകേസില്‍ സി.ബി.ഐ അന്വേഷണം ആവശ്യപ്പെട്ട് ബി.ജെ.പിയും ജമ്മുകശ്മീര്‍ ബാര്‍ അസോസിയേഷനും രംഗത്തെത്തിയിരുന്നു. കേസന്വേഷണം നടത്തുന്ന പോലീസുകാരില്‍ ചിലര്‍ നേരത്തെ ബലാത്സംഗ കേസുകളില്‍ പ്രതികളായിട്ടുണ്ടെന്നായിരുന്നു പ്രധാന ആരോപണം. ഇത്തരം വാദങ്ങള്‍ക്കിടെയാണ് കേസ് സംബന്ധിച്ച്‌ നിലപാട് വ്യക്തമാക്കി കശ്മീര്‍ പൊലീസ് രംഗത്തെത്തുന്നത്.
Post Your Comments