കൊച്ചി: കഞ്ചാവുമായി രണ്ടുപേരെ പോലീസ്‌ പിടികൂടി. തളിപ്പറമ്പ് മന്നദേശം സ്വദേശി ആബിദ്‌ (28), തളിപ്പറമ്പ് വീനസ്‌ സ്വദേശി അസ്‌ക്കര്‍ (32) എന്നിവരെയാണു എറണാകുളം നോര്‍ത്ത്‌ പോലീസ്‌ കളമശേരിയില്‍നിന്നു സാഹസികമായി പിന്തുടര്‍ന്നു പിടിച്ചത്‌. കാറിലെത്തിയ പ്രതികള്‍ കലൂരില്‍നിന്നു പോലീസ്‌ വാഹനത്തെ കബളിപ്പിച്ച്‌ കടന്നുകളയുകയായിരുന്നു.
എസ്‌.ഐ. വിപിന്‍ ദാസ്‌ പ്രതികളെ ബൈക്കിലും സ്‌പെഷല്‍ ഓപറേഷന്‍ ഗ്രൂപ്പിലെ രാജേഷും, പ്രഗേഷും മറ്റൊരു കാറിലും ഇവരെ പിന്തുടര്‍ന്നു. ഇടപ്പള്ളിയിലെത്തിയ ഇവര്‍ അവിടെനിന്ന്‌ അല്‍ അമീന്‍ സ്‌കൂളിനു സമീപത്തുകൂടെ വട്ടേക്കുന്നം വഴി സൗത്ത്‌ കളമശേരി മേല്‍പ്പാലമിറങ്ങിയ പ്രതികള്‍ മാതൃഭൂമി ഓഫീസിനു സമീപത്തുനിന്നുമാണ്‌ പിടിയിലായത്‌. ഇതിനിടെ പോലീസിന്റെ ബൈക്കിലും കാറിലും പ്രതികളുടെ കാര്‍ പലതവണ ഇടിപ്പിച്ചു. ഒടുവില്‍ എസ്‌.ഐ. സഞ്ചരിച്ചിരുന്ന ബൈക്ക്‌ പ്രതികളുടെ കാറിനു മുന്നിലേക്ക്‌ ഇടുകയായിരുന്നു.
രഹസ്യവിവരം ലഭിച്ചതിനെത്തുടര്‍ന്നാണ് നോര്‍ത്ത്‌ എസ്‌.ഐ. വിപിന്‍ ദാസിന്റെ നേതൃത്വത്തിലുള്ള സംഘം ഇവരെ പിടികൂടിയത്‌. ഇവരില്‍നിന്നു രണ്ടു കിലോ കഞ്ചാവ് പിടിച്ചെടുത്തു. പിടിയിലാകുമെന്നുറപ്പായപ്പോള്‍ പ്രതികള്‍ കഞ്ചാവ് പൊതികള്‍ പുറത്തേക്കെറിഞ്ഞു. കാര്‍ തടഞ്ഞിട്ടും ഇരുവരും രക്ഷപ്പെടാന്‍ ശ്രമിച്ചെങ്കിലും പോലീസും നാട്ടുകാരും ചേര്‍ന്നു കീഴ്‌പ്പെടുത്തുകയായിരുന്നു. കളമശേരി എസ്‌.ഐ. പ്രശാന്ത്‌ ക്ലിന്റ്‌, എ.എസ്‌.ഐമാരായ ടോമി, ഫൈസല്‍, സി.പി.ഒമാരായ അനില്‍, ജിനീഷ്‌, വിജയകുമാര്‍ തുടങ്ങിയവര്‍ സ്‌ഥലത്തെത്തിയിരുന്നു. കണയന്നൂര്‍ താലൂക്ക്‌ തഹസില്‍ദാര്‍ സ്‌ഥലത്തെത്തി മേല്‍നടപടികള്‍ സ്വീകരിച്ചു.
Post Your Comments