ഒടുവില്‍ ജയം, പരമ്പരയില്‍ ഒപ്പമെത്തി ദക്ഷിണാഫ്രിക്ക

സെഞ്ചൂറിയന്‍: രണ്ടാം ട്വന്റി20 മത്സരത്തില്‍ ഇന്ത്യയ്ക്ക് എതിരെ ദക്ഷിണാഫ്രിക്കയ്ക്ക് ആറ് വിക്കറ്റിന്റെ ജയം. ഇതോടെ മൂന്ന് മത്സരങ്ങള്‍ അടങ്ങുന്ന പരമ്പരയില്‍ ദക്ഷിണാഫ്രിക്ക 1-1ന് ഒപ്പമെത്തി. ഇന്ത്യ മുന്നോട്ട് വെച്ച 189 റണ്‍സ് വിജയലക്ഷ്യം എട്ട് പന്ത് ബാക്കിനില്‍ക്കേ നാല് വിക്കറ്റ് നഷ്ടത്തില്‍ ദക്ഷിണാഫ്രിക്ക മറികടന്നു.

30 പന്തില്‍ 69 റണ്‍സെടുത്ത ഹെന്റിക് ക്ലാസനും 40 പന്തില്‍ 64 റണ്‍സെടുത്ത ജെ.പി ഡുമിനിയുമാണ് ദക്ഷിണാഫ്രിക്കയെ വിജയത്തിലെത്തിച്ചത്. ഇന്ത്യയ്ക്കായി ഉന്‍ദ്കട്ട് രണ്ടും താക്കുറും പാണ്ഡ്യയും ഓരോ വിക്കറ്റും വിക്കറ്റ് സ്വന്തമാക്കി.

ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യയെ അര്‍ധ സെഞ്ചുറി നേടിയ മനീഷ് പാണ്ഡെയും എംഎസ് ധോണിയും ചേര്‍ന്നാണ് മികച്ച സ്‌കോറില്‍ എത്തിച്ചത്. മനീഷ് പാണ്ഡെ 48 പന്തില്‍ 79 റണ്‍ നേടിയപ്പോള്‍ എംഎസ് ധോണി 28 പന്തില്‍ 52 റണ്‍ നേടി.

ധവാന്‍ 24 റണ്‍ നേടിയപ്പോള്‍ രോഹിത് ശര്‍മ്മ റണ്‍ നേടാതെ പുറത്തായി. റെയ്‌ന 31 റണ്‍സും നായകന്‍ കോഹ്ലി ഒരു റണ്‍സിനും പുറത്തായി.