തിരുവനന്തപുരം: രാത്രി പോലീസിനെ കണ്ടു ഭയന്നോടിയ യുവാവ് മതിൽ ചാടി വീണത് ജയിൽ വളപ്പിൽ. പുലർച്ചെ വനിതാ ജയിലിലെ കുളിമുറിക്കു സമീപം ദുരൂഹ സാഹചര്യത്തിൽ കണ്ടെത്തിയ യുവാവിനെ ജയിൽ ജീവനക്കാരും ജയിൽ പുള്ളികളും ചേർന്ന് പിടികൂടി പോലീസിനെ ഏൽപ്പിച്ചു. അട്ടക്കുളങ്ങര വനിതാ ജയിൽ കോംപൗണ്ടിനുള്ളിൽ ഇന്നലെ പുലർച്ചെയോടെയായിരുന്നു സംഭവം. പോലീസ് ഇയാളെ അറസ്റ്റ് ചെയ്ത് റിമാൻഡ് ചെയ്തു.
മുടവൻമുകൾ സ്വദേശി രാജേഷ് (36) ആണ് അറസ്റ്റിലായത്. രാത്രിയിൽ പൊലീസിനെ ഭയന്നോടിയ യുവാവ് ജയിലിന്റെ മതിൽ ചാടിക്കടന്നു പുലരും വരെ കോംപൗണ്ടിൽ ഒളിച്ചിരിക്കുകയായിരുന്നു. എന്നാൽ പുലർച്ചെ തടവുകാരെ പ്രഭാതകൃത്യങ്ങൾ നിർവഹിക്കുന്നതിനായി സെല്ലിനുള്ളിൽനിന്നു പുറത്തിറക്കിയപ്പോഴാണു യുവാവിനെ കാണുന്നത്. തടവുകാർ ബഹളം വച്ചതിനെത്തുടർന്നു ജീവനക്കാർ എത്തി.
തുടർന്ന് ഈയാൾ കുളിമുറിയിൽ ഒളിച്ചു. എന്നാൽ സെക്യൂരിറ്റി ജീവനക്കാർ ഇയാളെ പുറത്തെത്തിച്ചു പോലീസിനെ ഏൽപ്പിച്ചു. രാത്രിയിൽ പൊലീസിനെ കണ്ടു ഭയന്നോടിയിട്ട് അബദ്ധത്തിൽ ജയിലിന്റെ മതിൽ ചാടിക്കടക്കുയായിരുന്നുവെന്ന് ഇയാൾ മൊഴി നൽകി. ജയിലിൽ അതിക്രമിച്ചു കടന്നതിനു യുവാവിനെതിര കേസെടുത്തു റിമാൻഡ് ചെയ്തു.
Post Your Comments