ടോക്കിയോ: മദ്യപിച്ച് അഴിഞ്ഞാടിയ യാത്രക്കാരന്‍ ഉണ്ടാക്കിയ പുകിലിനെ തുടര്‍ന്ന് വിമാനം ഒരു മണിക്കൂറോളം വൈകി. ഒടുവില്‍ പോലീസെത്തി ഇയാളെ അറസ്റ്റുചെയ്തു. ജപ്പാനിലെ നരിറ്റ വിമാനത്താവളത്തില്‍ നിന്ന് അമേരിക്കയിലെ ലോസ് ആഞ്ചലസിലേക്ക് പുറപ്പെട്ട ഓള്‍ നിപ്പോണ്‍ എയര്‍വേയ്‌സ് വിമാനത്തിലാണ് മദ്യപന്‍ അഴിഞ്ഞാടിയത്.
ബഹളമുണ്ടാക്കിയ യാത്രക്കാരന്റെ പേരോ മറ്റ് വിവരങ്ങളോ അധികൃതര്‍ പുറത്തുവിട്ടില്ല. ഇയാള്‍ അമേരിക്കക്കാരനാണെന്നാണ് റിപ്പോര്‍ട്ട്. അതേസമയം, വിമാനത്തില്‍ ഇയാള്‍ ഉണ്ടാക്കിയ രംഗങ്ങള്‍ യാത്രക്കാരിലൊരാള്‍ പകര്‍ത്തിയത് സമൂഹമാധ്യമങ്ങളില്‍ ഹിറ്റ് ആണ്.
വിമാനം ടേക്ക് ഓഫ് ചെയ്യുന്നതിന് തൊട്ടുമുന്‍പാണ് ബഹളം നടന്നത്. ചുമന്ന ഷര്‍ട്ട് ധരിച്ച മധ്യവയസ്‌കന്‍ മറ്റൊരു യാത്രക്കാരനെ കൈയേറ്റം ചെയ്യാന്‍ ശ്രമിക്കുന്നതും മുഖത്ത് ഇടിക്കുന്നതുമാണ് ദൃശ്യങ്ങള്‍. ആക്രമിക്കപ്പെടുന്ന യാത്രക്കാരന്‍ പ്രതിരോധിക്കുകയും തിരിച്ച് ഇടിക്കുകയും ചെയ്യുന്നു. വിമാനജീവനക്കാരി അക്രമിയെ പിടിച്ചുമാറ്റുന്നുണ്ടെങ്കിലും ഇയാള്‍ വീണ്ടും നിന്നെ ഞാന്‍ കൊല്ലുമെന്ന് ആക്രോശിച്ചുകൊണ്ട് അക്രമസക്തനായി.
മദ്യപന്റെ ആക്രമണത്തില്‍ വിമാനജീവനക്കാരില്‍ ഒരാള്‍ക്ക് പരിക്കേറ്റു. ഒടുവില്‍ പോലീസെത്തി മദ്യപനെ അറസ്റ്റുചെയ്തതോടെയാണ് വിമാനം പുറപ്പെട്ടത്.
Post Your Comments