കള്ളപ്പണം വെളുപ്പിക്കൽ: രാഷ്ട്രീയ പാർട്ടികൾക്കും കുരുക്ക് വീഴും, പ്രവർത്തിക്കാത്ത പാർട്ടികൾക്കെതിരേയും അന്വേഷണം

2005നു ശേഷം ഒരു തിരഞ്ഞെടുപ്പില്‍ മത്സരിക്കാത്തതും നിര്‍ജ്ജീവവുമായ 200 രാഷ്ട്രീയ പാര്‍ട്ടികള്‍ക്കെതിരെയാണ് തിരഞ്ഞെടുപ്പ് കമ്മീഷന്റെ നടപടി.രാഷ്ട്രീയ പാര്‍ട്ടികള്‍ക്ക് 20,000 രൂപയുടെ വരെ അസാധുവാക്കിയ 1,000, 500 രൂപ നോട്ടുകള്‍ നിക്ഷേപിക്കുന്നതിന് ആദായ നികുതി നല്‍കേണ്ടതില്ലെന്ന് കേന്ദ്രസര്‍ക്കാർ പ്രഖ്യാപിച്ചിരുന്നു.എന്നാൽ പ്രവർത്തനരഹിതമായ പാർട്ടികൾ ഈ ആനുകൂല്യം ദുരുപയോഗം ചെയ്യും.ഓരോ പാര്‍ട്ടികള്‍ക്കും സംഭാവനയായി ലഭിക്കുന്ന 20,000ന് മേലെയുള്ള തുക, ആര് സംഭാവന നല്‍കി തുടങ്ങിയ കാര്യങ്ങള്‍ വ്യക്തമാക്കുന്ന ആദായ നികുതി റിട്ടേണിന്റെ പകര്‍പ്പ് തിരഞ്ഞെടുപ്പ് കമ്മീഷന് സമര്‍പ്പിക്കണമെന്നാണ് നിയമം. എന്നാല്‍ മിക്കവാറും എല്ലാ രാഷ്ട്രീയ പാര്‍ട്ടികളും അവര്‍ക്ക് ലഭിക്കുന്ന സംഭാവന 20,000 വീതമുള്ള ചെറിയ തുകകളാക്കി കാണിക്കുകയാണ് പതിവ്.അതിനാൽ 20,000ന് താഴെയുള്ള തുകയ്ക്കും നിലവിലുള്ള നിയമം ബാധകമാക്കണമെന്ന് കമ്മീഷൻ സർക്കാരിനോട് ആവശ്യം ഉന്നയിച്ചിട്ടുണ്ട്.