എന്തിനാണ് ഈ ആക്രാന്തം? ജിഷക്കേസ് : മാധ്യമങ്ങള്‍ക്കെതിരെ കെ.സുരേന്ദ്രന്‍

തിരുവനന്തപുരം ● ജിഷയുടെ കൊലപാതകിയുമായി സഞ്ചരിക്കുന്ന പോലീസ് വാഹനത്തിന് പിന്നാലെ നടന്ന് തല്‍സമയ സംപ്രേക്ഷണം ചെയ്യുന്ന ചാനലുകള്‍ക്കെതിരെ ആഞ്ഞടിച്ച് ബി.ജെ.പി നേതാവ് കെ.സുരേന്ദ്രന്‍. ജിഷയുടെ കൊലയാളിയെ അറസ്റ്റ് ചെയ്ത കേരള പോലീസിന്റെ മിടുക്ക് അഭിനന്ദനാർഹമാണ്. എന്നാല്‍ ഈ വാർത്ത റിപ്പോർട്ട്‌ ചെയ്യുന്ന നമ്മുടെ ടെലിവിഷൻ ചാനലുകൾ അങ്ങേയറ്റം അരോചകമായ ഒരവസ്ഥയാണ് പ്രേക്ഷകർക്കു നൽകുന്നതെന്ന് സുരേന്ദ്രന്‍ ഫേസ്ബുക്ക്‌ പോസ്റ്റില്‍ പറഞ്ഞു.

എന്തോ വലിയ അന്വേഷണാത്മക പത്രപ്രവർത്തനം ചാനലുകൾ നടത്തുന്നതുപോലെയാണ് വാർത്താവതാരകന്മാരുടെയും റിപ്പോർട്ടർമാരുടെയും അവകാശവാദം. എന്തിനാണ് ഈ ആക്രാന്തം? ജനങ്ങൾ ജിഷയുടെ കൊലയാളിയെ പിടിച്ച കാര്യവും അതാരാണെന്നും എന്തൊക്കെ അന്വേഷണമാണ്‌ നടന്നതെന്നും മാത്രമേ അറിയാൻ ആഗ്രഹിക്കുന്നുള്ളൂ.സരിത സൂക്ഷിച്ച സി ഡി അന്വേഷിക്കാൻ പോയ സമയത്ത് ടെലിവിഷൻ ചാനലുകൾ കാണിച്ച അവിവേകമാണ് സി ഡി അവിടുന്നു മാറ്റാൻ കുറ്റവാളികൾക്ക് സഹായമായതെന്നും സുരേന്ദ്രന്‍ ആരോപിച്ചു.

വിലകുറഞ്ഞ മത്സരം അവസാനിപ്പിക്കണമെന്ന് ഭൂരിപക്ഷം ജനങ്ങളും ആഗ്രഹിക്കുന്നുവെന്ന് പറഞ്ഞുകൊണ്ടാണ് സുരേന്ദ്രന്‍ പോസ്റ്റ്‌ അവസാനിപ്പിക്കുന്നത്.

കെ.സുരേന്ദ്രന്റെ ഫേസ്ബുക്ക്‌ പോസ്റ്റിന്റെ പൂര്‍ണരൂപം

ജിഷയുടെ കൊലയാളിയെ അറസ്റ്റ് ചെയ്ത കേരള പോലീസിന്റെ മിടുക്ക് അഭിനന്ദനാർഹം. വളരെ ശാസ്ത്രീയമായ ഒരന്വേഷണരീതിയായിരുന്നു അത്. ഇവിടെ പറയാൻ പോകുന്ന വിഷയം അതല്ല. ഈ വാർത്ത റിപ്പോർട്ട്‌ ചെയ്യുന്ന നമ്മുടെ ടെലിവിഷൻ ചാനലുകൾ അങ്ങേയറ്റം അരോചകമായ ഒരവസ്ഥയാണ് പ്രേക്ഷകർക്കു നൽകുന്നത്. എന്തോ വലിയ അന്വേഷണാത്മക പത്രപ്രവർത്തനം ചാനലുകൾ നടത്തുന്നതുപോലെയാണ് വാർത്താവതാരകന്മാരുടെയും റിപ്പോർട്ടർമാരുടെയും അവകാശവാദം. ‘..ഇതാ പ്രതിയുമായി സഞ്ചരിക്കുന്ന പോലീസ് വാഹനത്തിന്റെ ദൃശ്യം ഞങ്ങൾക്കു ലഭ്യമായിരിക്കുന്നു. exclusive visuals..’ എന്നൊക്കെ പറഞ്ഞ് പോലീസ് ജീപ്പിനു പിന്നാലെ ഓടുകയാണ് മാധ്യമപ്രവർത്തകർ. ‘..ഇതാ പാലിയേക്കര ടോൾ ഗേറ്റ് കഴിഞ്ഞു, അങ്കമാലി വിട്ടുകഴിഞ്ഞു..’ എന്നും മറ്റും. എന്തിനാണ് ഈ ആക്രാന്തം? ജനങ്ങൾ ജിഷയുടെ കൊലയാളിയെ പിടിച്ച കാര്യവും അതാരാണെന്നും എന്തൊക്കെ അന്വേഷണമാണ്‌ നടന്നതെന്നും മാത്രമേ അറിയാൻ ആഗ്രഹിക്കുന്നുള്ളൂ. ഞാൻ മനസ്സിലാക്കുന്നത് പ്രതിയെ രണ്ടു ദിവസം മുൻപ് പോലീസ് കസ്റ്റഡിയിലെടുത്തിട്ടുണ്ടെന്നാണ്. വീരശൂര പരാക്രമികളെപോലെ ഇപ്പോൾ നടക്കുന്ന ഒരു മാധ്യമ പ്രവർത്തനം ആ വാർത്ത‍ അറിഞ്ഞില്ലെന്ന കാര്യത്തിൽ പോലീസിനു അഭിമാനിക്കാം. പണ്ട് സരിത സൂക്ഷിച്ച സി ഡി അന്വേഷിക്കാൻ പോയ സമയത്ത് ടെലിവിഷൻ ചാനലുകൾ കാണിച്ച അവിവേകമാണ് സി ഡി അവിടുന്നു മാറ്റാൻ കുറ്റവാളികൾക്ക് സഹായമായത്. ദയവായി ഈ വിലകുറഞ്ഞ മത്സരം നിങ്ങൾ അവസാനിപ്പിക്കണമെന്ന് ഭൂരിപക്ഷം ജനങ്ങളും ആഗ്രഹിക്കുന്നു.