അഗര്‍ത്തല: ത്രിപുരയില്‍ കോണ്‍ഗ്രസില്‍ ഇരുട്ടടി. പാര്‍ട്ടിക്ക് തിരിച്ചടി നല്‍കി ആറ് എം.എല്‍.എമാര്‍ തൃണമൂല്‍ കോണ്‍ഗ്രസില്‍ ചേര്‍ന്നു. ഇതോടെ നിയമസഭയില്‍ മുഖ്യപ്രതിപക്ഷ സ്ഥാനം കോണ്‍ഗ്രസില്‍ നിന്നും തൃണമൂല്‍ കോണ്‍ഗ്രസ് കരസ്ഥമാക്കി. മാണിക്ക് സര്‍ക്കാരിനെതിരെ പോരാടുന്നതിന് വേണ്ടിയാണ് പാര്‍ട്ടി വിടുന്നതെന്ന് എം.എല്‍.എമാര്‍ വ്യക്തമാക്കി. പാര്‍ട്ടി വിട്ട എം.എല്‍.എമാര്‍ സ്പീക്കര്‍ രാമേന്ദ്ര കെ നാഥിന് രാജിക്കത്ത് കൈമാറി.
സുധീപ് റോയ് ബര്‍മന്‍, ആശിശ് കുമാര്‍ സാഹ, ദിലീപ് സര്‍ക്കാര്‍ പരന്‍ജിത് സിംഗ് റോയ്, ദിബാ ചന്ദ്ര ഹര്‍ഗ്‌വാള്‍, ബിശ്വ ബന്ധു സെന്‍ എന്നിവരാണ് പാര്‍ട്ടി വിട്ടത്. 60 അംഗ ത്രിപുര നിയമസഭയില്‍ കോണ്‍ഗ്രസിന് പത്ത് അംഗങ്ങളാണ് ഉണ്ടായിരുന്നത്. പുതിയ സംഭവത്തോടെ കോണ്‍ഗ്രസിന്റെ അംഗബലം നാലായി ചുരുങ്ങി. തൃണമൂലിന് നിലവില്‍ അംഗങ്ങളൊന്നും ഉണ്ടായിരുന്നില്ല.
എംഎല്‍എമാരുടെ കൂറുമാറ്റം അടുത്തിടെ പലസംസ്ഥാനങ്ങളിലും കോണ്‍ഗ്രസിന് തിരിച്ചടി നല്‍കിയിരുന്നു. ഹിമാചല്‍ പ്രദേശില്‍ ഭരണം നഷ്ടപ്പെട്ട കോണ്‍ഗ്രസ് ഉത്തരാഖണ്ഡില്‍ കഷ്ടിച്ചാണ് ഭരണം നിലനിര്‍ത്തിയത്. അടുത്തിടെ തെരഞ്ഞെടുപ്പ് കഴിഞ്ഞ പശ്ചിമ ബംഗാളിലെ എംഎല്‍എമാരില്‍ നിന്ന് പാര്‍ട്ടി വിടില്ലെന്ന് കോണ്‍ഗ്രസ് എഴുതി വാങ്ങിയത് വിവാദമായിരുന്നു. കൂറുമാറ്റം തടയുന്നതിന്റെ ഭാഗമായിട്ടായിരുന്നു ഇത്.
Post Your Comments