മുംബൈ : ലൈംഗികമായി ഉപദ്രവിച്ച് സ്വകാര്യചിത്രങ്ങള്‍ പകര്‍ത്തിയെന്ന പെണ്‍കുട്ടിയുടെ പരാതിയില്‍ ടിക് ടോക് താരത്തിനെതിരെയും രണ്ട് സുഹൃത്തുക്കൾക്കെതിരെയും കേസെടുത്ത് പൊലീസ്. ടിക് ടോകിലൂടെ പരിചയപ്പെട്ട പെണ്‍കുട്ടിയെ തന്നെയാണ് ഇവർ ആക്രമിച്ചിരിക്കുന്നത്.
ടിക് ടോകിലൂടെ 16-കാരനും 17-കാരിയുമായ പെണ്‍കുട്ടിയും കഴിഞ്ഞ വര്‍ഷമാണ് പരിചയപ്പെടുന്നത്. സൗഹൃദം പിന്നീട് അടുപ്പമായി മാറി. എന്നാൽ, പിന്നീട് ഇരുവരും തമ്മിൽ വഴക്ക് പതിവായതോടെ ബന്ധത്തില്‍ നിന്ന് പിന്മാറുകയാണെന്ന് പെണ്‍കുട്ടി അറിയിച്ചു. ഇതോടെ സ്വകാര്യചിത്രങ്ങളും വീഡിയോകളും പ്രചരിപ്പിക്കുമെന്ന് 16 -കാരൻ പറഞ്ഞു. ഇതിലും പെൺകുട്ടി വഴങ്ങാതെ വന്നതോടെ നേരത്തെ നല്‍കിയ സമ്മാനങ്ങള്‍ തിരികെ നല്‍കാനെന്ന് പറഞ്ഞ് 16-കാരന്‍ പെണ്‍കുട്ടിയെ വീട്ടിലേക്ക് ക്ഷണിച്ചു. ഇവിടെ വെച്ച് 16-കാരനും രണ്ട് സുഹൃത്തുക്കളും ചേര്‍ന്ന് പെണ്‍കുട്ടിയെ ലൈംഗികമായി ഉപദ്രവിച്ചെന്നാണ് പരാതി. വടി കൊണ്ട് അടിച്ച് പരിക്കേല്‍പ്പിച്ചതായും പരാതിയിലുണ്ട്.
ആക്രമണത്തിനിരയായ പെണ്‍കുട്ടി തിരികെ വീട്ടിലെത്തി അമ്മയോടാണ് ആദ്യം വിവരം വെളിപ്പെടുത്തിയത്. തുടര്‍ന്ന് പെണ്‍കുട്ടിയും സഹോദരനും പോലീസ് സ്‌റ്റേഷനിലെത്തി പരാതി നല്‍കുകയായിരുന്നു. പരാതിയില്‍ കേസെടുത്തതായും പ്രതികളെ പിടികൂടുമെന്നും പോലീസ് പറഞ്ഞു.
Post Your Comments