റാസൽഖൈമ: വഴിതെറ്റി മലനിരകളിൽ കുടുങ്ങിയ വിനോദസഞ്ചാരികളെ രക്ഷപ്പെടുത്തി റാസൽഖൈമ പോലീസ്. റാസൽഖൈമയിലെ വാദി ഖദാ അയിലെ പർവതപ്രദേശത്ത് വഴിതെറ്റിയ ഏഴ് ഏഷ്യൻ വിനോദസഞ്ചാരികളെയാണ് പോലീസ് രക്ഷപ്പെടുത്തിയത്.
മലകയറി സാഹസികത പ്രകടിപ്പിക്കാൻ ശ്രമിച്ച ഇവർ തിരിച്ചിറങ്ങാൻ കഴിയാതെ വിഷമിക്കുകയായിരുന്നു. സാധാരണ വാഹനങ്ങൾക്ക് എത്തിപ്പെടാൻ പറ്റാത്ത ദുർഘട മലയിടുക്കുകളിലാണ് ഇവർ കുടുങ്ങിയത്. റാസൽഖൈമ പോലീസ് എയർ വിങ് മേധാവിയും വൈമാനികനുമായ കേണൽ സഈദ് റാഷിദ് അൽ യമാഹിയുടെ നേതൃത്വത്തിലായിരുന്നു രക്ഷാപ്രവർത്തനം.
രക്ഷാപ്രവർത്തകർ എത്തിയപ്പോൾ ഇവരിൽ പലരും അവശരായിരുന്നു. പോലീസ് ഇവർക്ക് ആവശ്യമായ സഹായങ്ങളെല്ലാം ചെയ്തു നൽകി. പിന്നീട് വിനോദസഞ്ചാരികളെ യാത്രാ വാഹനങ്ങൾക്ക് സമീപം എത്തിച്ചതായും പോലീസ് അറിയിച്ചു.
ദുഷ്‌കരമായ മലയോര മേഖലകളിൽ ഉയർന്ന താപനിലയുള്ള സമയത്ത് സാഹസിക യാത്ര നടത്തരുതെന്ന് പോലീസ് മുന്നറിയിപ്പ് നൽകുകയും ചെയ്തു.
Read Also: നടി കെപിഎസി ലളിത അന്തരിച്ചു
Post Your Comments