മാരകായുധവുമായി വീട്ടിൽ അതിക്രമിച്ച് കയറി വീട്ടമ്മയെ ആക്രമിച്ചു : പ്രതി അറസ്റ്റിൽ

തിരുവനന്തപുരം: മാരകായുധവുമായി വീട്ടിൽ അതിക്രമിച്ചു കയറി നാശനഷ്​ടം വരുത്തുകയും വീട്ടമ്മയെ ആക്രമിക്കുകയും ചെയ്ത കേസിലെ പ്രതി പിടിയിൽ. ആറ്റിപ്ര മുക്കോലക്കൽ കുറ്റിവിളാകത്ത് വീട്ടിൽ മുഹമ്മദ് ഹാഷിമാണ് (32) പിടിയിലായത്. കഴക്കൂട്ടം പൊലീസ് ആണ് പ്രതിയെ അറസ്​റ്റ്​ ചെയ്തത്.

തിങ്കളാഴ്ച രാത്രി 11 നായിരുന്നു കേസിനാസ്പദമായ സംഭവം. കഴക്കൂട്ടം നാലുമുക്കിലെ റംലാബീവിയുടെ വീട്ടിൽ ആണ് യുവാവ് അതിക്രമിച്ചു കയറി ആക്രമിച്ചത്. പ്രതി അവരുടെ തല ഭിത്തിയിൽ ഇടിച്ച് പരിക്കേൽപിക്കുകയും വാൾ വീശി കൊല്ലുമെന്ന് ഭീഷണിപ്പെടുത്തുകയും ചെയ്തു.

Read Also : പമ്പ ഡാം തുറന്നു : ജാഗ്രത പാലിക്കാൻ നിർദ്ദേശം

തടയാൻ ശ്രമിച്ച വീട്ടമ്മയുടെ ഭർത്താവിനെയും പ്രതി മർദ്ദിച്ചു. കൂടാതെ വീട്ടിലെ ജനൽ ചില്ലുകളും സ്കൂട്ടറും ബൈക്കും അടിച്ചു തകർക്കുകയും വീടിന്​ മുന്നിലെ കടയിലെ സാധനങ്ങൾ നശിപ്പിക്കുകയും ചെയ്തു. വീട്ടമ്മയുടെ മകനോട് പ്രതിക്കുള്ള മുൻവൈരാഗ്യമാണ് ആക്രമണത്തിന്​ കാരണമെന്നാണ് പറയുന്നത്.

സംഭവത്തിനു ശേഷം പ്രതി ഒളിവിൽ പോയിരുന്നു. തുടർന്ന് പ്രതിയെ അന്വേഷിച്ചു വരവെ കഴക്കൂട്ടം സൈബർ സിറ്റി എ.സി.പി സി.എസ്​. ഹരിക്ക്​ ലഭിച്ച രഹസ്യവിവരത്തിന്റെ അടിസ്ഥാനത്തിൽ കഴക്കൂട്ടം എസ്.എച്ച്.ഒ പ്രവീൺ, എസ്.ഐമാരായ ജിനു, മിഥുൻ, സി.പി.ഒമാരായ സജാദ്ഖാൻ, ബിനു.എസ്, ബിനു എന്നിവരടങ്ങിയ പൊലീസ് സംഘമാണ് അറസ്​റ്റ്​ ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.