വിദ്യാർഥികളുമായി പോകുകയായിരുന്ന സ്‌കൂള്‍ ബസിന് തീപിടിച്ചു: മലപ്പുറത്ത് ഒഴിവായത് വൻ ദുരന്തം

മലപ്പുറം: പൊന്നാനിയിൽ സ്‌കൂള്‍ ബസിന് തീപിടിച്ചു. അലങ്കാര്‍ തീയറ്ററിന് സമീപം ദേശീയ പാതയ്ക്കരികില്‍ വച്ച് നഗരസഭയുടെ ബഡ്‌സ് സ്‌കൂള്‍ ബസിനാണ് തീപിടിച്ചത്. വിദ്യാർഥികളുമായി പോകുമ്പോഴായിരുന്നു അപകടം. ഇന്ന് രാവിലെ ഒമ്പതരയോടെയാണ് ബസിന് തീപിടിച്ചത്. സംഭവത്തിൽ ആർക്കും പരിക്കില്ല.

വാഹനത്തിൻ്റെ ബോണറ്റിൽ നിന്ന് പുക ഉയരുന്നതാണ് ആദ്യം ശ്രദ്ധയിൽപെട്ടത്. ഡ്രൈവറുടെ അവസരോചിതമായ ഇടപെടൽ വൻ ദുരന്തം ഒഴിവാകാൻ കാരണമായി. തീ ഉയരുന്നത് കണ്ടതോടെ ബസിലുണ്ടായിരുന്ന കുട്ടികളെയും ആയയേയും ഡ്രൈവർ ആദ്യം ബസിന് പുറത്തെത്തിച്ചു.

ബോണറ്റ് ഉയർത്തിയതോടുകൂടി ബസിന്റെ എഞ്ചിൻ ഭാ​ഗത്ത് നിന്ന് തീ ഉയരുകയായിരുന്നു. അ​ഗ്നിശമന സേനയും നാട്ടുകാരും ചേർന്നാണ് തീ നിയന്ത്രണവിധേയമാക്കിയത്.