വിശാഖപട്ടണം: എട്ടു വയസ്സുള്ള പെണ്‍കുട്ടിയെ 12,13 വയസ്സിലുള്ള മൂന്ന് ആണ്‍കുട്ടികള്‍ ചേര്‍ന്ന് കൂട്ടബലാത്സംഗം ചെയ്ത ശേഷം കൊന്നു മൃതദേഹം കനാലില്‍ തള്ളി. ആന്ധ്രാപ്രദേശിലെ നന്ദ്യാല ജില്ലയില്‍ നടന്ന ഞെട്ടിക്കുന്ന സംഭവത്തില്‍ പെണ്‍കുട്ടിയുടെ മൃതദേഹം കനാലില്‍ ഉപേക്ഷിച്ചതായി കുട്ടികള്‍ ചോദ്യം ചെയ്യലില്‍ പോലീസിനോട് പറഞ്ഞു. പെണ്‍കുട്ടിയുടെ മൃതദേഹം ഇതുവരെ കണ്ടെടുത്തിട്ടില്ല.
ആന്ധ്രാ തലസ്ഥാനമായ അമരാവതിയില്‍ നിന്ന് 300 കിലോമീറ്റര്‍ അകലെയുള്ള മുച്ചുമാരിയിലാണ് സംഭവം. ഞായറാഴ്ച മുതല്‍ മൂന്നാംക്ലാസ്സ് വിദ്യാര്‍ത്ഥിനിയെ കാണാനില്ലായിരുന്നു. തുടര്‍ന്ന് പിതാവ് ലോക്കല്‍ പോലീസ് സ്റ്റേഷനില്‍ പരാതി നല്‍കുകയും ചെയ്തു. പെണ്‍കുട്ടി മുച്ചുമാരി പാര്‍ക്കില്‍ കളിക്കുകയായിരുന്നെന്നും പിന്നീട് വീട്ടിലെത്തിയില്ലെന്നും ഇയാള്‍ പോലീസിനോട് പറഞ്ഞിരുന്നു. പോലീസ് തിരച്ചില്‍ ആരംഭിച്ച്‌ പ്രദേശവാസികളെ ചോദ്യം ചെയ്‌തെങ്കിലും കണ്ടെത്താനായില്ല. തുടര്‍ന്ന് പോലീസ് നായയെ ഉപയോഗിച്ച്‌ അന്വേഷണം നടത്തി.
നായ പോലീസിനെ എത്തിച്ചത് പ്രായപൂര്‍ത്തിയാകാത്ത മൂന്ന് ആണ്‍കുട്ടികളുടെ അടുത്തേക്ക് ആയിരുന്നു. അവരില്‍ രണ്ടുപേര്‍ 6-ാം ക്ലാസ് വിദ്യാര്‍ത്ഥികളാണ്, 12 വയസ്സ്, ഒരാള്‍ 7-ാം ക്ലാസ്സില്‍ പഠിക്കുന്നു, 13 വയസ്സ്. മൂവരും പെണ്‍കുട്ടി പഠിക്കുന്ന അതേ സ്‌കൂളിലെ വിദ്യാര്‍ത്ഥികളാണ്. ചോദ്യം ചെയ്യലില്‍ പെണ്‍കുട്ടിയെ ബലാത്സംഗം ചെയ്ത് കൊലപ്പെടുത്തിയതായി ആണ്‍കുട്ടികള്‍ സമ്മതിച്ചതായി പോലീസ് പറഞ്ഞു.
പെണ്‍കുട്ടി പാര്‍ക്കില്‍ കളിക്കുന്നത് കണ്ട് കൂട്ടുകൂടുകയും തുടര്‍ന്ന് മുച്ചുമാരി അണക്കെട്ടിന് സമീപത്തെ ആളൊഴിഞ്ഞ സ്ഥലത്തേക്ക് കൊണ്ടുപോയി മാറിമാറി ബലാത്സംഗം ചെയ്യുകയുമായിരുന്നുവെന്ന് പ്രതികള്‍ പോലീസിനോട് പറഞ്ഞു. പീഡനവിവരം പെണ്‍കുട്ടി മാതാപിതാക്കളോട് പറഞ്ഞാല്‍ തങ്ങള്‍ക്കു പ്രശ്നമുണ്ടാകുമോയെന്ന ആശങ്കയില്‍ അവര്‍ അവളെ കൊലപ്പെടുത്തി. മൃതദേഹം സമീപത്തെ കനാലില്‍ തള്ളിയതായി ആണ്‍കുട്ടികള്‍ പോലീസിനോട് പറഞ്ഞു. പെണ്‍കുട്ടിയുടെ മൃതദേഹം ഇതുവരെ കണ്ടെത്താനാകാത്തതിനാല്‍ ഇത് മിസ്സിംഗ് കേസായി തുടരുകയാണെന്ന് മുച്ചുമാരി പോലീസ് സ്റ്റേഷനിലെ സബ് ഇന്‍സ്‌പെക്ടര്‍ ജയശേഖര്‍ പറഞ്ഞു.
Post Your Comments