ഇന്ന് മകര ചൊവ്വ, നിങ്ങളുടെ നക്ഷത്ര ദിനം ചൊവ്വാഴ്ച ആണോ? അറിയണം ഇക്കാര്യങ്ങൾ!! ചൊവ്വ ദശാ കാലത്ത് ഭദ്രകാളിയെ ഭജിക്കണം

ഇന്ന് മകരമാസത്തിലെ ആദ്യ ചൊവ്വ. ഇത് മകര ചൊവ്വ എന്ന പേരിൽ കേരളീയർ ആഘോഷിക്കുന്നുണ്ട്. ചൊവ്വയുടെ ഉച്ചക്ഷേത്രമാണ് മകരം. അതായത് ചൊവ്വ ബലവാനാകുന്ന രാശി. അതു കൊണ്ട് പ്രത്യേകിച്ചും മകരമാസത്തിലെ ആദ്യ ചൊവ്വ കേരളീയർ ആചരിക്കുന്നു.

മകര ചൊവ്വയുടെ ഐതീഹ്യത്തെക്കുറിച്ച് കൈതാരം ഉണ്ണികൃഷ്ണൻ നമ്പൂതിരി പറയുന്നത് ഇങ്ങനെ,

ചൊവ്വയുടെ അധിദേവതകൾ സുബ്രഹ്മണ്യസ്വാമിയും ഭദ്രകാളീയുമാണ് യുഗ്മരാശി ഭദ്രകാളിയേയും ഓജരാശി സുബ്രഹ്മണ്യനേയും ചൊവ്വയാൽ ചിന്തിക്കപ്പെടുന്നു. യുഗ്മരാശിയായ മകരം ഭദ്രകാളീ പ്രീതിക്കാണ് പ്രാധാന്യമുള്ള കാലം. ഭദ്രകാളീക്ഷേത്രങ്ങളില്‍ ദേവിയുടെ കളം വരച്ച് പൂജനടത്തുകയും, നവകം മുതലായവ ഭഗവതിയ്ക്ക് ആടി ചൈതന്യത്തെ ശക്തിപ്പെടുത്തുകയുംചെയ്യുന്നു.

കേരളത്തിൽ ശിവപുത്രിയും ദാരിക നാശിനിയുമായ കാളിയേയും മറ്റു ചിലയിടത്ത് ഗൗരിയുടെ അംശമായ പാർവ്വതിയെത്തന്നെ കാളിയായും ആരാധിക്കുന്നു. പ്രാചീനകാലം മുതൽതന്നെ കേരളത്തിലാകമാനം കാവുകളിൽ പരദേവതയായും കുലദേവതയായും ആദിചാരമാരണ രോഗ ദാരിദ്ര നാശത്തിനും ദേശ സംരക്ഷണത്തിനുമായി കാവിലമ്മയായി ആരാധിച്ചിരുന്ന, ആരാധിക്കുന്ന അമ്മദൈവ സങ്കല്പമാണ് കാളി. കാളിയും സരസ്വതിയും ഒന്നു തന്നെ എന്ന് തന്ത്രം. ദശമഹാവിദ്യകളിൽപ്പെട്ട മന്ത്രമൂർത്തിയാണ് കാളീദേവി
കവിതിലകനായ കാളിദാസന്റെ കഥയും കൊടുങ്ങലൂരമ്മയുടെ ദാസനായ കൊടുങ്ങല്ലൂർ തമ്പുരാന്റെ പാണ്ഡിത്യവും കാളീദേവി സരസ്വതി തന്നെ എന്നതിന് തെളിവാണ്.

‘ഭദ്രം കരോതി ഇതിഭദ്രകാളി’

മംഗളത്തെ ചെയ്യുന്ന മംഗള സ്വരൂപിണിയാണ് കാളിയമ്മ.

ജാതക പ്രകാരം യുഗ്മരാശികളായ ഇടവം, കർക്കിടകം, കന്നി, വൃശ്ചികം, മകരം, ‘ മീനം ഇവയിൽ ചൊവ്വ നില്ക്കുന്നവർ നിത്യവും പ്രത്യേകിച്ച് ചൊവ്വ ദശാ കാലത്തും ഭദ്രകാളിയെ ഭജിക്കണം
മകര ചൊവ്വക്ക് ഭദ്രകാളീക്ഷേത്ര ദർശനം അതിമധുര പായസ നിവേദ്യം ഇവ നടത്തുന്നത് ചൊവ്വ ദോഷത്തിന് പരിഹാരമാണ്. ചൊവ്വ ലഗ്നം നാല്, അഞ്ച് ,ഒൻപത് ഇവ കളിലുള്ളവർ സൗമ്യമൂർത്തിയായ ഭദ്രകാളിയെ ഭജിക്കുന്നതുത്തമം രണ്ട്, ഏഴ്, പത്ത്, പതിനൊന്ന് ഇവകളിൽ ചൊവ്വ നില്ക്കുന്നവർ സുമുഖി കാളി അല്ലെങ്കിൽ അഞ്ജലചലനിഭാ എന്ന ധ്യാനത്തിലുള്ള ഭഗവതിയെ ഭജിക്കുന്നതു നന്നായിരിക്കും മൂന്ന്, ആറ്, എട്ട് ഇവയിലുള്ളവർ കൊടുങ്കാളികരിങ്കാളി ഇത്യാദികളേയും തമോഗുണാധിക്യമുള്ള പ്രതിഷ്ഠാ മൂർത്തികളേയും ഭജിക്കുന്നതുത്തമം. എന്നാൽ ഏതു തരക്കാർക്കും പൊതുവായി ‘കാളീം മേഘ സമപ്രഭാം’ എന്ന ധ്യാന സങ്കല്ല പ്രതിഷ്ഠയെ ആരാധിക്കാം

 തികഞ്ഞ ഭക്തിവിശ്വാസത്തോടെ സൗകര്യമുള്ള ഭദ്രകാളിയെ ആരാധിച്ചാലും മതി. ഭക്തിവിശ്വാസാദികൾക്കാണ് പ്രധാന്യം പൊതുവെ ഒരു നിയമം പറഞ്ഞു എന്നേ ഉള്ളൂ
‘സ്ത്രീണാം നിന്ദാം പ്രഹരം ച
കൗടില്യം വാ അപ്രിയംവചi
ആത്മനോഹിത മന്വിച്ഛൻ
കാളീ ഭക്തോ വിവർജ്ജയേൽ ‘

അഭിവൃദ്ധിയെ ആഗ്രഹിക്കുന്ന കാളീഭക്തൻ സ്ത്രീകളെ നിന്ദിക്കാനോ ഉപദ്രവിക്കാനോ അവരോട് കളവ് പറയുകയോ അഹിതം പറയുകയോ പാടില്ല. ഭദ്രകാളീകോപമായിരിക്കും ഫലം. പക്ഷബലമില്ലാത്ത ചന്ദ്രൻ ജാതകത്തിലുള്ളവരും കാളിയെ ഭജിക്കണം. നക്ഷത്ര ദിനം ചൊവ്വാഴ്ച, തിങ്കൾ, അമാവാസി ഇതൊക്കെ വിശേഷമാണ്. പ്രത്യേകിച്ചും മകരത്തിലെ ആദ്യചൊവ്വ.

കാർത്തിക, ഉത്രം, ഉത്രാടം, അശ്വതി, മകം, മൂലം,പൂയം, അനിഴം, ഉത്രട്ടാതി ഇവർക്ക് ചൊവ്വ അശുഭകാരനാണ് ഇവർ നിത്യേന ഭദ്രകാളീ ഭജനം വേണം. ഭരണി, പൂരാടം, പൂരം, ആയില്യം, കേട്ട, രേവതി, പുണർതം, വിശാഖം, പുരുരുട്ടാതി ഇവർ ചന്ദ്രന് പക്ഷബലമില്ലാത്ത സമയത്താണ് ജനിച്ചതെങ്കിൽ പതിവായി ഭജിക്കണം.
അമ്മേ ശരണം…. ദേവീ ശരണം…