തർക്കങ്ങൾ പരിഹരിക്കുന്നതിനും അന്താരാഷ്ട്ര നിയമങ്ങൾ പാലിക്കുന്നതിനുമാണ് ഇന്ത്യ ഊന്നൽ നൽകുന്നത്: ജനറൽ മനോജ് പാണ്ഡെ

ഡൽഹി: തർക്കങ്ങൾ സമാധാനപരമായി പരിഹരിക്കുന്നതിനും അന്താരാഷ്ട്ര നിയമങ്ങൾ പാലിക്കുന്നതിനുമാണ് ഇന്ത്യയുടെ കാഴ്‌ചപ്പാട് ഊന്നൽ നൽകുന്നതെന്ന് വ്യക്തമാക്കി കരസേനാ മേധാവി ജനറൽ മനോജ് പാണ്ഡെ. പരമാധികാരത്തോടും പ്രാദേശിക സമഗ്രതയോടും ഇതേ കാഴ്‌ചപ്പാടാണ് ഉള്ളതെന്നും ജനറൽ മനോജ് പാണ്ഡെ കൂട്ടിച്ചേർത്തു. കിഴക്കൻ ലഡാക്കിൽ ചൈനയുമായുള്ള അതിർത്തി തർക്കം രൂക്ഷമായ പശ്ചാത്തലത്തിലാണ് കരസേനാ മേധാവി നിലപാട് വ്യക്തമാക്കിയത്.

ലോകമെമ്പാടുമുള്ള പുതിയ ഇടങ്ങളിൽ ഇന്ത്യ പ്രതിരോധ വിഭാഗങ്ങൾ സ്ഥാപിക്കുകയാണെന്നും, സൗഹൃദ വിദേശ പങ്കാളി രാജ്യങ്ങളുമായുള്ള സംയുക്ത സൈനിക പരിശീലനത്തിന്റെയും അഭ്യാസത്തിന്റെയും വ്യാപ്‌തിയും തോതും വർദ്ധിപ്പിക്കാൻ സൈന്യത്തിന് താൽപ്പര്യമുണ്ടെന്നും ജനറൽ പാണ്ഡെ പറഞ്ഞു. നിരാശയ്ക്കും ഭൗമരാഷ്ട്രീയ പ്രവാഹത്തിനും ഇടയിലുള്ള തെളിച്ചമാർന്ന ഇടം എന്നാണ് അദ്ദേഹം ഇന്ത്യയെ വിശേഷിപ്പിച്ചത്. എല്ലാ പങ്കാളികളുമായും ക്രിയാത്മകമായി ഇടപഴകുന്നതിനുള്ള ഇന്ത്യയുടെ പ്രതിബദ്ധത വർഷങ്ങളായി അചഞ്ചലമാണെന്നും ജനറൽ പാണ്ഡെ കൂട്ടിച്ചേർത്തു.