ഇന്ത്യ-മിഡിൽ ഈസ്റ്റ്-യൂറോപ്പ് ഇടനാഴി ലോക വ്യാപാരത്തിന്റെ അടിത്തറയാകും: പ്രധാനമന്ത്രി മോദി

ഇന്ത്യ-മിഡിൽ ഈസ്റ്റ്-യൂറോപ്പ് ഇടനാഴി വരും നൂറ്റാണ്ടുകളിൽ ലോക വ്യാപാരത്തിന്റെ അടിസ്ഥാനമായി മാറുമെന്ന് പ്രധാനമന്ത്രി നരേന്ദ്ര മോദി. സമ്പന്നവും മികച്ചതുമായ വ്യാപാര ശക്തിയായിരുന്നപ്പോൾ ഇന്ത്യ ഉപയോഗിച്ചിരുന്ന പുരാതന വ്യാപാര ഇടനാഴിയായ ‘സിൽക്ക് റൂട്ട്’ മോദി അനുസ്മരിച്ചു. അടുത്തിടെ ഇന്ത്യ-മിഡിൽ ഈസ്റ്റ്-യൂറോപ്പ് സാമ്പത്തിക ഇടനാഴിയാണ് രാജ്യം നിർദ്ദേശിച്ചതെന്ന് അദ്ദേഹം പറഞ്ഞു. തന്റെ പ്രതിമാസ മൻ കി ബാത്ത് പ്രക്ഷേപണത്തിൽ സംസാരിക്കുകയായിരുന്നു പ്രധാനമന്ത്രി.

ഇന്ത്യയുടെ ചന്ദ്രയാൻ -3 ദൗത്യത്തിന്റെ വിജയത്തിനു ശേഷമുള്ള വിജയകരമായ ഉച്ചകോടി ഓരോ പൗരന്റെയും സന്തോഷത്തെ ഇരട്ടിയാക്കിയെന്നും ജനങ്ങളിൽ നിന്ന് തനിക്ക് ലഭിച്ച സന്ദേശങ്ങളിൽ അത് പ്രകടമാണെന്നും അദ്ദേഹം പറഞ്ഞു. ആഫ്രിക്കൻ യൂണിയനെ ജി 20 അംഗമാക്കുന്നതിൽ വിജയിച്ചതിനാൽ ഇന്ത്യയുടെ നേതൃത്വത്തെ ലോകം അംഗീകരിച്ചു. ജി 20 ഉച്ചകോടിക്ക് ആതിഥേയത്വം വഹിച്ച വേദിയായ ഭാരത് മണ്ഡപം ‘പ്രശസ്തമായി’ മാറിയിരിക്കുന്നു. അത്യാധുനിക കോൺഫറൻസ് ഹാളിനൊപ്പം ആളുകൾ സെൽഫി എടുക്കുകയാണെന്നും അദ്ദേഹം ചൂണ്ടിക്കാട്ടി.

ലോക വിനോദസഞ്ചാര ദിനം സെപ്റ്റംബർ 27 ന് വരുന്നതായി സൂചിപ്പിച്ച അദ്ദേഹം, വിനോദസഞ്ചാരം കുറഞ്ഞ മുതൽമുടക്കിൽ പരമാവധി തൊഴിലവസരങ്ങൾ സൃഷ്ടിക്കുമെന്നും വിനോദസഞ്ചാരികളെ ആകർഷിക്കുന്നതിൽ സുമനസ്സുകൾ വളരെ പ്രധാനമാണെന്നും പറഞ്ഞു. കഴിഞ്ഞ കുറച്ച് വർഷങ്ങളിലായി ഒരു ലക്ഷത്തിലധികം വിദേശ പ്രതിനിധികൾ രാജ്യത്തിന്റെ വിവിധ ഭാഗങ്ങളിൽ യാത്ര ചെയ്യുകയും അതിന്റെ വൈവിധ്യവും പൈതൃകവും സാക്ഷ്യപ്പെടുത്തുകയും ചെയ്തതിനാൽ ജി 20 സമ്മേളനത്തോടെ കൂടുതൽ ‘പ്രശസ്തി’ ലഭിച്ചിരിക്കുകയാണെന്നും പ്രധാനമന്ത്രി പറഞ്ഞു.