ഹൈന്ദവ വിശ്വാസ പ്രകാരം ഐശ്വര്യദേവതയായ മഹാലക്ഷ്മിയുടെ എട്ട് അവതാര രൂപങ്ങളെയാണ് അഷ്ടലക്ഷ്മികള്‍ എന്ന് അറിയപ്പെടുന്നത്. സമ്പത്തിന്റെ എട്ട് സ്രോതസ്സുകളുടേയും അധിപയാണ് അഷ്ടലക്ഷ്മികള്‍. അഷ്ടലക്ഷ്മീപൂജ അനുഷ്ഠിക്കുന്നവര്‍ക്ക് ആരോഗ്യം, വിദ്യ, ധൈര്യം, സന്താനങ്ങള്‍, ശക്തി തുടങ്ങി സര്‍വ്വൈശ്വര്യങ്ങളും ലഭിക്കുമെന്നാണ് വിശ്വാസം.
ആദിലക്ഷ്മി
അഷ്ടലക്ഷ്മികളില്‍ ആദ്യത്തേത് ആദിലക്ഷ്മിയാണ്. സര്‍വ്വ സൃഷ്ടികളുടേയും ആദി രൂപമാണ് ദേവിയെന്ന് വിശ്വസിക്കുന്നു. മഹാലക്ഷ്മി എന്നും ആദി ലക്ഷ്മിയെ വിശേഷിപ്പിക്കാറുണ്ട്. അനന്തമായ സമ്പത്ത് പ്രദാനം ചെയ്യുന്ന ദേവി ഭൃഗുമുനിയുടെ പുത്രിയാണ്. താമരയില്‍ ഇരിക്കുന്ന ആദിലക്ഷ്മിക്ക് നാലു കരങ്ങളുണ്ട്. ചുവന്ന ഉടയാടയണിഞ്ഞ് സര്‍വ്വാഭരണ വിഭൂഷിതയായ ദേവി ഒരു കൈയ്യില്‍ താമരയും മറ്റൊന്നില്‍ വെളുത്ത പതാകയും ഏന്തിയിരിക്കുന്നു. മറ്റ് രണ്ട് കരങ്ങളില്‍ അഭയ,വരദ മുദ്രകളാണുള്ളത്. നാരായണ പത്‌നിയായ മഹാലക്ഷ്മി വൈകുണ്ഠവാസിനിയാണ്. ഭക്തന് സദാ ആനന്ദം നല്‍കുന്ന ആദിലക്ഷ്മിക്ക് രമ എന്ന പേരുമുണ്ട്.. സ്‌നേഹത്തെ സൂചിപ്പിക്കുന്ന ചുവന്ന പുഷ്പങ്ങള്‍ ദേവിക്ക് സമര്‍പ്പിക്കുന്നത് അതി ശ്രേഷ്ഠമാണ്. ആദിമരൂപത്തോടു കൂടിയ ദേവിയെ മനഃശുദ്ധിയോടെയും പൂര്‍ണ വിശ്വാസത്തോടെയും വേണം പൂജിക്കാന്‍.
ധനലക്ഷ്മി
അഷ്ടലക്ഷ്മികളില്‍ രണ്ടാമത്തേതാണ് ധനലക്ഷ്മി. പണം, സ്വര്‍ണം തുടങ്ങി എല്ലാ പ്രത്യക്ഷ സമ്പത്തിന്റേയും ദേവതയാണിവര്‍. ചുവന്ന ഉടയാടയണിഞ്ഞ് താമരപ്പൂവില്‍ വാഴുന്ന ദേവി ആറു കരങ്ങളോടു കൂടിയവളാണ്. ശംഖ്, ചക്രം, കലശം, പത്മം,ധനുര്‍ എന്നിവ ധരിച്ച ദേവിയുടെ അഭയ മുദ്രയിലുള്ള കരത്തില്‍ നിന്ന് ധനം വര്‍ഷിക്കുന്നു. ദീപാവലി, ധന്‍തേരസ് എന്നീ ആഘോഷ വേളകളില്‍ ഐശ്വര്യ സിദ്ധിക്കായി പലയിടങ്ങളിലും ധനലക്ഷ്മീ പൂജ നടത്താറുണ്ട്.
ധാന്യലക്ഷ്മി
ലക്ഷ്മീദേവിയുടെ മൂന്നാമത്തെ രൂപമായ ധാന്യലക്ഷ്മിയെ ഭൂമിയിലെ സര്‍വ്വ ചരാചരങ്ങളുടേയും അന്നദായിനിയാണ് കണക്കാക്കുന്നത്. എട്ട് കൈകളോട്കൂടിയ രൂപമാണ് ധാന്യലക്ഷ്മിയുടേത്. ദേവി പച്ച നിറത്തിലുള്ള വസ്ത്രം അണിഞ്ഞിരിക്കുന്നു. കൈകളില്‍ ധാന്യക്കതിര്‍, കരിമ്പ്, കദളീഫലം, താമര, അഭയമുദ്ര, വരദമുദ്ര എന്നിവയാണുള്ളത്.ധാന്യ സമൃദ്ധിയുടെ ദേവതയായ ധാന്യലക്ഷ്മി കടാക്ഷിച്ചാല്‍ കര്‍ഷകന് നല്ല വിളവെടുപ്പ് ലഭിക്കും. ധാന്യലക്ഷ്മി അനുഗ്രഹിക്കാതെ ജീവന് നിലനില്‍പ്പില്ല എന്നാണ് വിശ്വാസം.
പാവപ്പെട്ടവന്‍, പണക്കാരന്‍, നല്ലവന്‍, ദുഷ്ടന്‍ ഇങ്ങനെ എല്ലാത്തരം ആളുകളുമായും ഇടപഴകുന്നവളാണ് ധാന്യലക്ഷ്മി.എന്നാല്‍ ദേവിയുടെ ഈ പെരുമാറ്റത്തില്‍ ബലരാമന് അതൃപ്തി തോന്നി. തുടര്‍ന്ന് ബലരാമന്റെ നിര്‍ബന്ധത്തിന് വഴങ്ങി ശ്രീകൃഷ്ണന്‍ ധാന്യലക്ഷ്മിയെ തന്റെ ദേശത്തു നിന്നും അകറ്റി നിര്‍ത്തി. എന്നാല്‍ ധാന്യലക്ഷ്മി ദേശത്തു നിന്നും മാറി നിന്ന് അധികം വൈകാതൈ ആര്‍ക്കും കഴിക്കാന്‍ ഭക്ഷണമില്ലാതായി. തനിക്ക് തെറ്റ് പറ്റിയത് മനസ്സിലാക്കിയ കൃഷ്ണന്‍ ധാന്യലക്ഷ്മിയോട് പ്രാര്‍ത്ഥിച്ചു. ഒടുവില്‍ ദേവി കടാക്ഷിക്കുകയും പട്ടിണിയകലുകയും ചെയ്തു. അങ്ങനെ ധാന്യലക്ഷ്മിയുടെ മഹത്വം എന്തെന്ന് ഭഗവാന് ബോധ്യമായി.
ഗജലക്ഷ്മി
മൃഗസമ്പത്തിന്റെ ദേവതയായ ഗജലക്ഷ്മി സമൃദ്ധിയും സന്തോഷവും പ്രദാനം ചെയ്യുന്നു. പത്മാസനസ്ഥയായ ദേവിയുടെ ഇരുവശങ്ങളിലുമായി രണ്ട് ആനകളുണ്ട്. ആനയുടെ തുമ്പിക്കൈയില്‍ നിന്നും ജലധാര പ്രവഹിക്കുന്നു. നാല് കരങ്ങളോടുകൂടിയ രൂപമാണ് ഗജലക്ഷ്മിയുടേത്. രണ്ട് കരങ്ങളില്‍ താമരയും മറ്റ് രണ്ടെണ്ണത്തില്‍ അഭയ-വരദ മുദ്രകളുമാണ്. കന്നുകാലികള്‍ ആനകള്‍ തുടങ്ങിയ മൃഗസമ്പത്ത് പ്രദാനം ചെയ്യുന്ന ഗജലക്ഷ്മിയെ പ്രീതിപ്പെടുത്താന്‍ ഭാഗ്രപാദശുക്ല ദശമിയില്‍ വ്രതം അനുഷ്ഠിക്കുന്നത് ഉത്തമമാണ്.
സന്താനലക്ഷ്മി
ഭക്തര്‍ക്ക് സന്താനഭാഗ്യം നല്‍കുന്ന ലക്ഷ്മീരൂപമാണ് സന്താനലക്ഷ്മി. ആറ് കൈകളോട് കൂടിയവളാണ് ദേവി. രണ്ട് കൈകളില്‍ കലശവും രണ്ടെണ്ണത്തില്‍ വാളും പരിചയും ഏന്തിയിരിക്കുന്നു. മറ്റൊരു കൈകൊണ്ട് മടിത്തട്ടിലിരിക്കുന്ന ശിശുവിനെ ചേര്‍ത്ത് പിടിച്ചിരിക്കുന്നു. ഒരു കൈയ്യില്‍ അഭയ മുദ്രയുമാണുള്ളത്. മടിയില്‍ ഇരിക്കുന്ന ശിശുവിന്റെ കൈയ്യില്‍ അഭയ മുദ്രയും താമരപ്പൂവും കാണാം. സന്താനങ്ങല്‍ക്ക് ആയുരാരോഗ്യ സൗഖ്യമേകുന്ന ദേവി അവരെ എല്ലാ രോഗങ്ങളില്‍ നിന്നും കാത്തു രക്ഷിക്കുന്നു എന്നാണ് വിശ്വാസം.
വീരലക്ഷ്മി (ധൈര്യലക്ഷ്മി)
ധൈര്യത്തിന്റേയും കരുത്തിന്റേയും ദേവതയായ വീരലക്ഷ്മി
യുദ്ധം പോലുള്ള സന്ദര്‍ഭങ്ങളില്‍ ധൈര്യം പ്രദാനം ചെയ്യുന്നു എന്നാണ് വിശ്വാസം. ദേവിക്ക് ധൈര്യലക്ഷ്മിയെന്നും പേരുണ്ട്. ജീവിതത്തില്‍ അനഭവപ്പെടുന്ന പ്രശ്‌നങ്ങളെ അഭിമുഖീകരിക്കാനും തരണം ചെയ്യാനുമുള്ള ആര്‍ജ്ജവം ധൈര്യലക്ഷ്മിയെ ആരാധിക്കുന്നതിലൂടെ കൈവരുന്നു. എട്ട് കൈകളോടുകൂടിയ ദേവി ശംഖ്,ചക്രം,അമ്പ്, വില്ല്, ത്രിശൂലം ഗ്രന്ഥം, അഭയമുദ്ര, വരമുദ്ര എന്നിവയേന്തിയിരിക്കുന്നു. പത്മാസനസ്ഥയായ വീരലക്ഷ്മി ചുവന്ന നിറത്തിലുള്ള വസ്ത്രമാണ് ധരിച്ചിരിക്കുന്നത്.
വിജയലക്ഷ്മി
വിജയം പ്രദാനം ചെയ്യുന്ന ലക്ഷ്മീ രൂപമാണ് വിജയലക്ഷ്മി. പോര്‍ക്കളത്തിലെ വിജയം മാത്രമല്ല, ജീവിതം വിജയം പ്രദാനം ചെയ്യുന്നവളാണ് ദേവി. എട്ടുകരങ്ങളുള്ള ദേവി, ശംഖ്, ചക്രം, വാള്‍, പരിച, പത്മം, പാശം എന്നിവയേന്തിയിരിക്കുന്നു. മറ്റ് രണ്ടു കരങ്ങളില്‍ അഭയ, വരദ മുദ്രകളുമുണ്ട്.
വിദ്യാലക്ഷ്മി
ലക്ഷ്മീദേവിയുടെ അവതാരരൂപങ്ങളില്‍ അവസാനത്തേതാണ് വിദ്യാലക്ഷ്മി. സര്‍വധനങ്ങളിലേക്കും വെച്ച് ഏറ്റവും ശ്രേഷ്ഠമായ വിദ്യയുടെയും അറിവിന്റേയും ദേവതയാണ് വിദ്യാലക്ഷ്മി. എട്ടുകൈകളില്‍ രണ്ടെണ്ണത്തില്‍ കമലവും മറ്റുള്ളവയില്‍ വാള്‍, പരിച, ശംഖ്, ചക്രം, അഭയ, വരദ മുദ്രകളുമാണുള്ളത്. ഏതു സമ്പത്ത് നേടണമെങ്കിലും വിദ്യ കൂടിയേ തീരൂ. അതിനാല്‍ വിദ്യാലക്ഷ്മിയുടെ കടാക്ഷമില്ലാതെ ജീവിത വിജയം അസാധ്യമാണ്.
Post Your Comments