കൊച്ചി: മാരക മയക്കുമരുന്നായ എംഡിഎംഎയുമായി യുവാക്കള്‍ പൊലീസ് പിടിയില്‍. കാസര്‍ഗോഡ് കടംകുളം ചെറുവത്തൂര്‍ നവാസ് (30), കണ്ണൂര്‍ പയ്യന്നൂര്‍ മുണ്ടേല്‍ ജിതേഷ് (26) എന്നിവരെയാണ് അറസ്റ്റ് ചെയ്തത്.
നോര്‍ത്ത് പൊലീസ് നോര്‍ത്ത് റെയില്‍വേ സ്‌റ്റേഷന് സമീപത്തുള്ള ഹോട്ടലില്‍ നിന്നാണ് ഇവരെ മയക്കുമരുന്നുമായി പിടികൂടിയത്. ഇവരുടെ പക്കല്‍ നിന്നും 13.14 ഗ്രാം എംഡിഎംഎ പൊലീസ് പിടിച്ചെടുത്തിട്ടുണ്ട്.
ബംഗളൂരുവിൽ നിന്ന് കേരളത്തിലേക്ക് മയക്കുമരുന്ന് എത്തിച്ചു വില്പന നടത്തുന്ന സംഘത്തില്‍പെട്ട ഇവരെ ആഴ്ചകളായി പൊലീസ് നിരീക്ഷിച്ച് വരികയായിരുന്നു. ബസ് മാര്‍ഗം നവാസ് എംഡിഎംഎ കൊച്ചിയിലെത്തിക്കുമ്പോള്‍ അത് ഇവിടെ ചെറിയ അളവില്‍ ആക്കി വില്‍ക്കാന്‍ സഹായിക്കുന്നത് ജിതേഷാണ്.
കൊച്ചി സിറ്റി പൊലീസ് കമ്മീഷണര്‍ സേതുരാമന് ലഭിച്ച രഹസ്യ വിവരത്തിന്‍റെ അടിസ്ഥാനത്തില്‍ എറണാകുളം ടൗണ്‍ നോര്‍ത്ത് പൊലീസും കൊച്ചിസിറ്റി യോദ്ധാവ് സ്‌ക്വാഡും സൈബര്‍ സെല്ലിന്‍റെ സഹായത്തോടെ സംയുക്തമായി നടത്തിയ പരിശോധനയിലാണ് പ്രതികള്‍ പിടിയിലായത്. പ്രതികളെ കോടതിയിൽ ഹാജരാക്കി.
Post Your Comments