‘ഇരട്ടശങ്കദൃഷ്ടിയിൽ ന്യൂയോർക്കിലെ റോഡ് മുകളിൽ, താഴെയുള്ളത് കേരളത്തിലേതും! – കാണണമെങ്കിൽ ഫോൺ തലതിരിച്ച് പിടിക്കുക’

തിരുവനന്തപുരം: കേരളത്തിലെ റോഡുകൾ ന്യൂയോർക്കിലെ റോഡുകളേക്കാൾ കേമമാണെന്ന് പറഞ്ഞ മുഖ്യമന്ത്രി പിണറായി വിജയനെ പരിഹസിച്ച് രാഷ്ട്രീയ നിരീക്ഷകൻ ശ്രീജിത്ത് പണിക്കർ. ന്യൂയോർക്കിലെ അതിവികസന പാതയുടെയും, കേരളത്തിലെ കുണ്ടും കുഴിയും നിറഞ്ഞ പാതയുടെയും ചിത്രങ്ങൾ പങ്കുവെച്ചുകൊണ്ടായിരുന്നു ശ്രീജിത്തിന്റെ പരിഹാസം.

‘ഇരട്ടശങ്കദൃഷ്ടിയിൽ ന്യൂയോർക്കിലെ റോഡും (മുകളിൽ) കേരളത്തിലെ റോഡും (താഴെ). നിങ്ങൾക്കും അങ്ങനെ കാണണമെങ്കിൽ ഫോൺ തലതിരിച്ചു പിടിച്ച് നോക്കുക’, ശ്രീജിത്ത് ഫേസ്‌ബുക്കിൽ കുറിച്ചു.

അതേസമയം, ന്യൂയോർക്ക് മലയാളികൾക്ക് കേരളത്തിലെ റോഡുകൾ ഒരു അത്ഭുതമാണെന്നായിരുന്നു മുഖ്യമന്ത്രിയുടെ പരാമർശം. ന്യൂയോർക്കിൽ കഴിയുന്ന മലയാളികൾ അടുത്തയിടെ കേരളം വന്നു കണ്ടപ്പോൾ ആണ് ഇക്കാര്യം തന്നോട് പറഞ്ഞതെന്നും മുഖ്യമന്ത്രി പറയുന്നു. ന്യൂയോർക്കിലുള്ള മലയാളിയുടെ പേര് വെളിപ്പെടുത്തുന്നില്ലെന്നും അദ്ദേഹം അറിയിച്ചു. യു.എസിൽ മെഡിസിനിൽ എംഡിക്കു പഠിക്കുന്ന മകനോടൊപ്പമാണ് ന്യൂയോർക്കിലുള്ള മലയാളി തന്നെ കാണാൻ വന്നതെന്നും, ഇവർ തൃശൂരിൽ നിന്നും പാലക്കാട്ടേക്ക് സഞ്ചരിച്ചപ്പോഴാണ് റോഡിന്റെ വികസനം കണ്ട് അമ്പരന്നതെന്നും മുഖ്യമന്ത്രി പറഞ്ഞു. മുൻപ് അവർ ഈ വഴി പോയപ്പോൾ ഇതായിരുന്നില്ല അവസ്ഥയെന്ന് അവർ ഓർത്തെടുത്തു. റോഡിന്റെ കാര്യത്തിന്റെ മാത്രമല്ല മറ്റു പല കാര്യങ്ങളിലും കേരളത്തിനു മാറ്റമുണ്ടായെന്ന് അവർ വെളിപ്പെടുത്തിയെന്നും പിണറായി വിജയൻ വ്യക്തമാക്കി.