ചാലക്കുടി: കൊരട്ടിയില്‍ മദ്യപാനത്തിനിടെയുണ്ടായ തര്‍ക്കത്തില്‍ യുവാവിന് വെട്ടേറ്റ സംഭവത്തിലെ പ്രതി അറസ്റ്റിൽ. കട്ടപ്പുറം ഗോപുരന്‍ വീട്ടില്‍ സ്‌നേഹേഷിനാണ് (36) വെട്ടേറ്റത്. ഇയാളെ സെന്റ് ജെയിംസ് ആശുപത്രിയില്‍ ചികിത്സയിലാണ്. ഇതുമായി ബന്ധപ്പെട്ട് അയല്‍വാസി വെളിയത്തുപറമ്പില്‍ ദീപുവിനെയാണ് (32) അറസ്റ്റ് ചെയ്തത്. കൊരട്ടി എസ്.എച്ച്.ഒ ബി.കെ. അരുണ്‍ ആണ് പ്രതിയെ അറസ്റ്റ് ചെയ്തത്.
കഴിഞ്ഞദിവസം രാത്രിയാണ് കേസിനാസ്പദമായ സംഭവം. കട്ടപ്പുറം പാടത്ത് ഇവരും മറ്റു മൂന്നുപേരും ചേര്‍ന്നു മദ്യപിക്കുകയായിരുന്നു. നേരത്തേയുണ്ടായ വഴക്ക് പറഞ്ഞുതീര്‍ക്കാന്‍ ദീപു 5,000 രൂപ ആവശ്യപ്പെട്ടു. തുടർന്ന്, സ്‌നേഹേഷ് 2,000 രൂപ നല്‍കാമെന്നും സമ്മതിച്ചു. എന്നാല്‍, വഴങ്ങാതിരുന്ന ദീപു അവിടെ നിന്ന് തിരിച്ചുപോയി. പിന്നീട് ബൈക്കില്‍ മറ്റൊരാളൊപ്പം സഞ്ചരിച്ച സ്നേഹേഷിനെ ബൈക്കില്‍ എതിരെ വന്ന ദീപു വാക്കത്തി കൊണ്ട് വെട്ടിവീഴ്ത്തുകയായിരുന്നു.
ഇതിനിടെ ഇരുബൈക്കുകളും താഴെവീണു. തുടർന്ന്, വീണ്ടും വെട്ടുന്നതിനിടെ ബഹളംകേട്ട നാട്ടുകാര്‍ എത്തിയാണ് സ്നേഹേഷിനെ രക്ഷപ്പെടുത്തിയത്. അറസ്റ്റിലായ പ്രതിയെ കോടതിയിൽ ഹാജരാക്കിയ ശേഷം റിമാൻഡ് ചെയ്തു.
Post Your Comments