കക്ഷിരാഷ്ട്രീയം മറന്ന് വികസന പ്രവർത്തനങ്ങളിൽ എല്ലാവരും പങ്കാളികളാകണം: മന്ത്രി എം ബി രാജേഷ്

തിരുവനന്തപുരം: സാധാരണ ജനങ്ങളുടെ ദൈനംദിന ജീവിത പ്രശ്നങ്ങൾ പരിഹിക്കുന്നതിനുള്ള വികസന പ്രവർത്തനങ്ങളിൽ കക്ഷി രാഷ്ട്രീയത്തിന് അതീതമായി എല്ലാവരും ഒന്നിച്ചു നിൽക്കണമെന്ന് തദ്ദേശ സ്വയംഭരണ വകുപ്പ് മന്ത്രി എം ബി രാജേഷ്. അമിതമായ കക്ഷി രാഷ്ട്രീയത്തിന്റെ പേരിൽ വികസന പ്രവർത്തനങ്ങൾക്ക് തടസ്സം നിൽക്കുമ്പോൾ നഷ്ടം സംഭവിക്കുന്നത് പാവപ്പെട്ട ജനങ്ങൾക്കാണെന്നും അദ്ദേഹം കൂട്ടിച്ചേർത്തു. തിരുവനന്തപുരം നഗരസഭയിലെ മണക്കാട് വാർഡിലെ കരിമഠം കോളനിയിൽ നിർമാണം പൂർത്തിയാക്കിയ 40 ഫ്‌ളാറ്റുകളുടെ താക്കോൽദാനവും പുതിയ ഫ്‌ളാറ്റ് സമുച്ചയത്തിന്റെ നിർമാണോദ്ഘാടനവും നിർവഹിക്കുകയായിരുന്നു മന്ത്രി.

Read Also: ദാനം ചെയ്യുന്നത് നല്ലത്, പക്ഷേ മതപരിവർത്തനം പാടില്ല, തടയാനെന്ത് സംവിധാനമുണ്ടെന്ന് അറിയിക്കാൻ കേന്ദ്രത്തോട് സുപ്രീംകോടതി

പാവപ്പെട്ടവരുടെ ക്ഷേമവും പുരോഗതിയും ഉറപ്പ് വരുത്തുന്നതിന് നഗരസഭ വലിയ പ്രാധാന്യമാണ് നൽകുന്നത്. പുതിയ ഭരണസമിതി അധികാരത്തിലെത്തിയ ശേഷം തിരുവനന്തപുരം നഗരസഭാ പരിധിയിൽ 384 ഫ്‌ളാറ്റുകളാണ് നിർമാണം പൂർത്തിയാക്കിയത്. വികസന പ്രവർത്തനങ്ങളിലെ തുടർച്ചയുടെ നേർസാക്ഷ്യമാണിതെന്നു മന്ത്രി പറഞ്ഞു. ഏറ്റവും കൂടുതൽ ഭവന നിർമാണം നടത്തിയ നഗരസഭയും തിരുവനന്തപുരമാണെന്ന് അദ്ദേഹം വ്യക്തമാക്കി.

ദാരിദ്യ ലഘൂകരണ പ്രവർത്തനങ്ങളിലെ മികവിനുള്ള നിതി ആയോഗ് അവാർഡും ഓൺലൈൻ സേവനങ്ങൾ മികച്ച രീതിയിൽ നൽകിയതിനും മികച്ച പ്രവർത്തനങ്ങൾക്കുള്ള പുരസ്‌കാരവും നഗരസഭയ്ക്ക് ലഭിച്ചത് കാര്യക്ഷമമായ പ്രവർത്തനങ്ങളുടെ ഫലമാണെന്നും മന്ത്രി കൂട്ടിച്ചേർത്തു. കരിമഠത്ത് ഭവന സമുച്ചയ മാതൃകയിൽ 560 വീടുകളും, അനുബന്ധ അടിസ്ഥാന സൗകര്യങ്ങളും, അംഗൻവാടി, കമ്മ്യൂണിറ്റിഹാളുകൾ, മാർക്കറ്റ് എന്നിവ നിർമിക്കുക, പ്രദേശത്തെ കുളം പുനരുജ്ജീവിപ്പിക്കുക തുടങ്ങിയവയാണ് പദ്ധതിയിൽ ഉൾപ്പെടുന്നത്. ആദ്യ മൂന്ന് ഘട്ടങ്ങളിലായി 320 ഫ്‌ളാറ്റുകൾ ഗുണഭോക്താക്കൾക്ക് കൈമാറിയിട്ടുണ്ട്. ഒരു ബെഡ്‌റൂം, ഒരു ഹാൾ, ഒരു ടോയിലറ്റ്, ഒരു കിച്ചൺ എന്നിങ്ങനെ 350 സ്‌ക്വയർ ഫീറ്റ് വിസ്തീർണത്തിലാണ് ഓരോ ഫ്‌ളാറ്റും നിർമിച്ചിട്ടുള്ളത്. പണി പൂർത്തിയായ ഫ്‌ളാറ്റുകളിൽ കുടിവെള്ളം, വൈദ്യുതി തുടങ്ങിയ അടിസ്ഥാന സൗകര്യങ്ങളും ഉറപ്പാക്കിയിട്ടുണ്ട്.

തിരുവനന്തപുരം മേയർ ആര്യ രാജേന്ദ്രൻ, ക്ഷേമകാര്യ സ്റ്റാന്റിംഗ് കമ്മിറ്റി ചെയർമാൻ എസ് സലിം, നാഗരാസൂത്രണ സ്റ്റാൻഡിങ് കമ്മറ്റി ചെയർപേഴ്സൺ ജിഷ ജോൺ, നികുതി അപ്പീൽ കാര്യ സ്റ്റാൻഡിങ് കമ്മറ്റി ചെയർപേഴ്സൺ സിന്ധു വിജയൻ, മണക്കാട് വാർഡ് കൗൺസിലർ കെ കെ സുരേഷ്, പ്രൊജക്റ്റ് ഓഫിസർ ജി എസ് അജികുമാർ, സൂപ്രണ്ടിങ് എൻജിനീയർ അജിത്കുമാർ ജി എസ് തുടങ്ങിയവർ പ്രസംഗിച്ചു.

Read Also: ഈ ആപ്പ് ഫോണിൽ ഇൻസ്റ്റാൾ ചെയ്തവർ സൂക്ഷിക്കുക, സ്വകാര്യ വിവരങ്ങൾ ചോർത്തിയേക്കും