‘ഭാരത് ജോഡോ യാത്ര കൊണ്ട് ഫലമുണ്ടാകില്ല, അതൊരു സ്റ്റണ്ട് മാത്രം’: വിമർശിച്ച് മാര്‍ക്കണ്ഡേയ കട്ജു

ആന്ധ്രാപ്രദേശ്: രാഹുൽ ഗാന്ധി നയിക്കുന്ന കോൺഗ്രസിന്റെ ഭാരത് ജോഡോ യാത്ര ഇന്ന് ആന്ധ്രാപ്രദേശിൽ പ്രവേശിക്കും. ജോഡോ യാത്രയെ വിമർശിച്ച് വിരമിച്ച സുപ്രീം കോടതി ജഡ്ജി മാര്‍ക്കണ്ഡേയ കട്ജു. ഭാരത് ജോഡോ യാത്ര ഒരു സ്റ്റണ്ട് മാത്രമാണെന്നും, അത് കൊണ്ട് കോൺഗ്രസിന് യാതൊരു ഫലവും ഉണ്ടാകില്ലെന്നും അദ്ദേഹം നിരീക്ഷിക്കുന്നു.

ജനങ്ങൾ വലിയതോതിൽ വർഗീയ-ജാതി അടിസ്ഥാനത്തിൽ ധ്രുവീകരിക്കപ്പെട്ടവരാണെന്നും, അവർ വോട്ട് ചെയ്യാൻ പോകുമ്പോൾ ജാതിയും മതവും മാത്രമാണ് നോക്കുന്നതെന്നും അദ്ദേഹം നിരീക്ഷിച്ചു. തൊഴിലില്ലായ്മ, വിലക്കയറ്റം, ആരോഗ്യ സംരക്ഷണം തുടങ്ങിയ വിഷയങ്ങൾ അവർക്ക് മുന്നിൽ അപ്രസക്തമാണ് എന്നാണ് കട്ജു പറയുന്നത്.

അതേസമയം, മുൻ കർണാടക മുഖ്യമന്ത്രി സിദ്ധരാമയ്യയും പാർട്ടിയുടെ ഉന്നത നേതാക്കളും അണിനിരന്ന ശേഷം രാഹുൽ ഗാന്ധി തന്റെ യാത്ര പുനരാരംഭിച്ചു. മുൻ കോൺഗ്രസ് അധ്യക്ഷൻ ആന്ധ്രാപ്രദേശിലെ അനന്തപൂർ ജില്ലയിലെ ഒബാലപുരത്ത് തമ്പടിച്ച ശേഷമായിരിക്കും അടുത്ത യാത്ര. ആന്ധ്രാപ്രദേശിലെ യാത്രയ്ക്ക് ശേഷം അദ്ദേഹം തിരികെ ഇന്നോ നാളെയോ കർണാടകയിലെത്തും. കർണാടകയിൽ തിരിച്ചെത്തിയ ശേഷം വയനാട് എംപി രാത്രി ബല്ലാരി ജില്ലയിലെ ഹലകുന്ധി മഠത്തിൽ തങ്ങും.

ഭാരത് ജോഡോ യാത്ര സെപ്റ്റംബർ 30 ന് കർണാടകയിൽ പ്രവേശിച്ചു, 21 ദിവസത്തിനുള്ളിൽ 511 കിലോമീറ്റർ പിന്നിട്ട് ഒക്ടോബർ 20 ന് സംസ്ഥാനത്ത് നിന്ന് പുറപ്പെടും. വിഘടന ശക്തികൾക്കെതിരെ ഇന്ത്യയെ ഒന്നിപ്പിക്കുക എന്ന ലക്ഷ്യത്തോടെയാണ് രാഹുൽ ഗാന്ധി യാത്ര നയിക്കുന്നത്.